სამკურნალო მცენარეების ქუთაისური საწარმო (ფოტო)

11:00 / 01.04.2018

ქუთაისიპოსტი აგრძელებს რუბრიკას - "დამზადებულია ქუთაისში". რუბრიკის ფარგლებში, თვეში ერთხელ, გაგაცნობთ ჩვენი ქალაქის თანამედროვე საწარმოებს.

***

სამკურნალო პრეპარატების მწარმოებელი საწარმო "ფარკონი" ქუთაისში 1997 წლიდან ფუნქციონირებს. კომპანიის დასახელება ორი სიტყვის "ფარისა" და "კონის" ერთობლიობას წარმოადგენს. მისი ავტორი საწარმოს დამფუძნებელი გახლავთ. მამუკა ალფაიძე განმარტავს, რომ ორივე სიტყვა მათ წარმოებას უშუალოდ უკავშირდება.

"ნედლეული საწარმოში კონებად შეკრული მოდის, სამკურნალო მცენარეები კი ჩვენი ჯანმრთელობის ფარია და ამგვარად მივუსადაგე," - ამბობს მამუკა ალფაიძე.

"ფარკონის" ხელმძღვანელი ინჟინერ მექანიკოსი და ტექნიკურ მეცნიერებათა დოქტორია. ამბობს, რომ პირველად სამკურნალო მცენარეებს სადისერტაციო ნაშრომზე მუშაობის პერიოდში გაეცნო, როდესაც კატაბალახას ასაღები მანქანა შექმნა და გამოცადა.

"ფარკონი", დაარსების დღიდანვე, ქუთაისთან ახლოს, გუმათჰესის დასახლებაში მდებარეობს. თავდაპირველად, საწარმოს ძალიან მცირე ფართი ეჭირა და სულ 5 თანამშრომელი ჰყავდა.

"ვაკეთებდით ნედლეულს, ძირითადად, ველურად მზარდ სამკურნალო მცენარეებს, ვამუშავებდით და მთელ პროდუქციას ვაგზავნიდით ექსპორტზე," - ამბობს მამუკა ალფაიძე.

რამდენიმე წლის წინ, "ფარკონის" სამკურნალო მცენარეების ხაზს კიდევ ჩაის და სანელებლების ხაზიც დაემატა.

დღეისათვის კომპანია ჯანდაცვის სამინისტროს მიერ რეგისტრირებულ 41 სახეობის სამკურნალო პრეპარატს აწარმოებს, რომლებიც მთელი ქვეყნის მასშტაბით სააფთიაქო ქსელში იყიდება.

ადგილობრივ ბაზარზე რამდენიმე წელია გამოჩნდა საწარმოში დამზადებული მოცვის, ასკილის, პიტნის, გვირილისა და კარკადეს ჩაი, აგრეთვე 30-მდე დასახელები სანელებელი ქართული სამზარეულოსთვის. ყველა ეს პროდუქტი 100%-ით ნატურალურია.

როგორც სანელებლები, ასევე ჩაი, ადგილზე "ხომლის" სამარკო ნიშნით იყიდება. მამუკა ალფაიძე ამბობს, რომ ეს სახელწოდება ხვამლის მთის პატივსაცემად შეარჩია, რომელიც საწამოს ზემოდან გადმოჰყურებს.

"ფარკონში" ახლა 17 თანამშრომელი მუშაობს, ბენეფიცირების რიცხვი კი, რომლებიც კომპანიასთან თანამშრომლობენ და მათ ნედლეულს აწვდიან, 500-ს აღემატება. ისინი სამკურნალო მცენარეებს, კენკრასა და ველურ ხილს ეკოლოგიურად სუფთა გარემოში, სესასბამაისი მეთოდების დაცვით აგროვებენ.

2016 წელს, USAID/REAP-ის პროექტის დახმარებით, კომპანია გადამამუშავებელი და დასაფასოებელი თანამედროვე დანადგარებით აღიჭურვა.

1997 წლიდან "ფარკონმა" წარმოება მნიშვნელოვნად გაზარდა. თუ დასაწყისში 20 ტონა პროდუქტს აწარმოებდა, 2016 წლისთვის საწარმოს წლიურმა წარმოებამ 250 ტონა შეადგინა.

პროდუქციის დიდი ნაწილი ექსპორტზე გადის, თუმცა მხოლოდ დასაფასოებელი. კომპანიაში განმარტავენ, რომ უცხოურ ბაზარზე შეფუთული ნაწარმის გატანას უფრო მასშტაბური წარმოება სჭირდება.

"ფარკონში" სამომავლო გეგმებზეც საუბრობენ.

"საინტერესო სფეროა სამკურნალო მცენარეებთან ურთიერთობა. სხვადასხვა ფორმით შეიძლება მათი წარმოება, როგორიცაა აბები, კაფსულები. თუმცა, ამას ამ ეტაპზე ვერ შევძლებთ, დრო და ბევრი შრომა ჭირდება," - ამბობს "ფარკონის" ხელმძღავნელი, მამუკა ალფაიძე.

კომპანია აქტიურად მონაწილეობს საქართველოში დამზადებული პროდუქციის გამოფენა-გაყიდვაზე, რომელიც თბილისში ყოველწლიურად იმართება. "ფარკონი" ამ ღონისძიებისთვის წელსაც ემზადება. ასევე, გასულ წელს, კომპანიის ნაწარმი რამდენიმე საერთაშორისო გამოფენაზეც წარადგინეს.

ავტორი:

დეა მანაგაძე

ავტორის სხვა სტატიები

თეგები: #ქუთაისი #ფარკონი #საწარმო

მასალის გამოყენების პირობები