ქუთაისიპოსტი

საქართველოს პრემიერ-მინისტრმა, გიორგი კვირიკაშვილმა, ტენდერებთან დაკავშირებით მუნიციპალიტეტების ხელმძღვანელებს დავალება მისცა.
"მუნიციპალური ტენდერების შემთხვევაში, როცა სახელმწიფო ფულით კომპანიები ახორციელებენ ტენდერებს, უგვიანებენ ხელფასებს თანამშრომლებს. ეს არის აბსოლუტურად მიუღებელი პრაქტიკა. ყველა მუნიციპალიტეტში განხორციელდეს კონტროლი ამ თვალსაზრისით, რომ თუკი სადმე არის ამგვარი პრაქტიკა, რეაგირება იყოს უმკაცრესი", - განაცხადა პრემიერ მინისტრმა.


პრემიერის ამ განცხადების პასუხად, ქუთაისის მერი ამბობს, რომ ქალაქში ეს პრობლემა არ არის. შოთა მურღულია მხოლოდ ერთადერთ შემთხვევას იხსენებს, როდესაც ტენდერში გამაჯვებულმა კომპანიამ დასაქმებულებს ხელფასი არ გადაუხადა. თუმცა, აღნიშნავს, რომ ადგილობრივი თვითმმართველობა კომპანიის სამეწარმეო საქმიანობაში ვერ ჩაერევა.

ქუთაისის მერიის მიერ გამოცხადებულ ტენდერში გამარჯვებული კომპანიის მიერ მოტუებული მუშების მოთხოვნები ნახეთ სიუჟეტში:



ავტოქარხნის დასახლებაში სკოლამდელი დაწესებულების მშენებლობაზე ქუთაისის მერიამ 499 126 ლარის ღირებულების ელექტრონული ტენდერი 2014 წლის 10 ივლისს გამოაცხადა. ტენდერით სამი სამშენებლო კომპანია შპს "ნიუ კონსტრაქშენი", შპს "ჯი აი თი -2007" და შპს "კავკასუსინვესტი" დაინტერესდა. თუმცა, მერიამ ხელშეკრულება შპს "ჯი-აი თი 2007"-თან გააფორმა.

კომპანიამ ქვეკონტრაქტორად შპს "ლინი" აიყვანა, რომელთანაც მუშებმა ხელშეკრულება გააფორმეს.

საბავაშვო ბაღის მშენებლობაზე 9 ბრიგადა მუშაობდა, ხელფასი კი ამ დრომდე არც ერთ მათგანს მიუღია. მუშებმა თანხის მიღების მოთხოვნით არაერთი აქცია გამართეს.

ქუთაისის საქალაქო სასამართლოში გამართულ მუშების პროცესზე შპს "ჯი-აი თი 2007"-სა და "ლინის" წარმომადგენლები არ გამოცხადდნენ. როგორც გაირკვა, "ლინი" ამჟამად აღარ არსებობს, "ჯი-აი თი 2007" კი პასუხისმგებლობას იხსნის და იმ მოტივით, რომ თანხა ქვეკონტრაქტორს გადაუხადა, მუშებისთვის დავალიანების ანაზღაურებას "ლინს" აკისრებს.

საბავშვო ბაღის მშენებლობაზე დასაქმებულები ამბობენ, რომ ორივე კომპანია კარგად გამართული თაღლითური სქემით მუშაობდა.

ქუთაისიპოსტი ამ თემაზე მუშაობას აგრძელებს და დეტალებს შემდგომში შემოგთავაზებთ.

რაც შეეხება სხვა შემთხვევას, სადაც ანალოგიური პრობლემა გამოვლინდა, ეს ქუთაისში რუსთაველის ხიდის რეაბილიტაციის ტენდერია. მასში გამარჯვებულ კომპანიას შპს "გეგი" მერია ხელშეკრულებით ნაკისრი ვალდებულებების შეუსრულებლობას ედავებოდა, რისთვისაც მას ადგილობრივი თვითმმართველობისთვის 165 818,93 ლარის გადახდა დაეკისრა.

შპს "გეგის" მსგავსად, მერია ხელშეკრულებით ნაკისრი ვადებულებების შეუსრულებლობას სს "იბერია-21", შპს "სამი ძმა+", "საბა 2010", "მსმ გროუპი", "Euro Group"-სა და "ფაუნა 2007"-ს ედავებოდა.