ქუთაისიპოსტი

საპარლამენტო არჩევნებამდე ცოტა ხნით ადრე, შუქრუთელების პროტესტზე დაწყებული მედიაციის გაურკვეველ გარემოებაში შეწყვეტის შემდეგ, შუქრუთის მოსახლეობა კვლავ პრობლემის გადაჭრის მოლოდინშია.

შუქრუთელების ერთადერთი იმედი - მედიაცია, რომელიც წინასაარჩევნო პერიოდში დაიწყო, არჩევნების ჩატარებასთან ერთად დასრულდა. "ქართული ოცნების" ხელისუფლებამ მიიღო ის, რაც სურდა - შუქრუთელებმა, რომლებიც პარლამენტის წინ 43 დღე შიმშილობდნენ, დედაქალაქი დატოვეს და სოფელში დაბრუნდნენ. მას შემდეგ სამი თვე გავიდა, თუმცა, არც რეჟიმის და არც "ჯორჯიან მანგანეზის" წარმომადგენლებს შუქრუთელებთან შეხვედრა არ უცდია.

დაზარალებული მოსახლეობა ახლა თავს მოტყუებულად გრძნობს და ბრძოლის სამართლებრივი გზით გაგრძელებას აპირებს.

"მედიაცია იყო მორიგი ტყუილი. მაშინ, არჩევნები იყო კარსმომდგარი და პარლამენტის წინ მოშიმშილე ადამიანები არ უნდოდათ. ამისთვის გამოიყენეს მედიაცია, ვითომ, სახელმწიფო ერთვებოდა საქმეში. რაც პროტესტი დასრულდა თბილისში, მას შემდეგ კომუნიკაციაზე არავინ გამოსულა. კომპანიამ ცალმხრივად გააკეთა განცხადება, რომ თურმე, ჩვენ შეგვიწყვეტია მოლაპარაკებები, რაც სრული სიცრუეა", - ამბობს სოფელ შუქრუთის მკვიდრი, გიორგი ნეფარიძე.

პროტესტის მონაწილეები, კომპანიასთან დავის საქმის სტრასბურგის სასამართლოში გასაჩივრებას აპირებენ.

"სულ რომ შეწყვიტოს "ჯორჯიან მანგანეზმა" მადნის მოპოვება, როგორც მაღაროებში, ასევე კარიერებზე, იმ ზიანს, რაც მათ მიაყენეს ჩვენს სოფელს, არაფერი გამოასწორებს. ამიტომ მათ, სახელმწიფოსთან ერთად, სამართლებრივი პასუხისმგებლობის აღება აუცილებლად მოუწევთ, ეს მხოლოდ დროის საკითხია. ჩვენ მივალთ ყველა ინსტანციამდე და აუცილებლად წავიღებთ საქმეს სტრასბურგის სასამართლოში", - ამბობს გიორგი ნეფარიძე.

ჭიათურის სოფელ შუქრუთის მოსახლეობა ათი თვეა უწყვეტ აქციებს მართავს. შუქრუთელები, "ჯორჯიან მანგანეზს", მის მიერ მადნის მომპოვებელი სამუშაოების გამო, საცხოვრებელი სახლების დანგრევაში ადანაშაულებენ. ადგილობრივები კომპანიისგან სამართლიან კომპენსაციას მოითხოვენ, რათა ალტერნატიული საცხოვრებელი ფართები შეიძინონ და უსაფრთხო გარემოში ცხოვრება შეძლონ. ამ მოთხოვნით მათ 311 დღის წინ სოფლის ქვეშ გამავალი მაღაროს შესასვლელი ჩაკეტეს და უწყვეტი აქციები დაიწყეს. პროტესტმა რომ შედეგი არ გამოიღო, ისინი დედაქალაქში, პარლამენტის წინ გადავიდნენ და 43 დღე იშიმშილეს. შიმშილის ფასად მოპოვებული მედიაცია კი, რომელშიც შუამავლად "ქართული ოცნების" პარლამენტის დეპუტატი რატი იონათამიშვილი ჩაერთო, უშედეგო აღმოჩნდა.

სამართლიანი კომპენსაციის მისაღებად შუქრუთელები მეექვსე წელია იბრძვიან. ისინი პროტესტში 2019 წლიდან ჩაერთნენ, მას შემდეგ, რაც მათ სახლებს ბზარები გაუჩნდა, რომლებიც ყოველდღიურად იზრდებოდა. საბოლოოდ კი სახლების ნაწილი მიწამ ჩაიტანა.

"ჯორჯიან მანგანეზი" აცხადებს, რომ მან დაზარალებულებზე უკვე გასცა თანხა, თუმცა, შუქრუთელები ამბობენ, რომ ეს მხოლოდ ავანსი იყო და არა სამართლიანი კომპენსაცია. მათი თქმით, ზარალი სამხარაულის ექსპერტიზის ბიურომ უნდა დაითვალოს და ამის მიხედვით განაწილდეს თანხა.

რა ბედი ეწია შუქრუთელებსა და "ჯორჯიან მანგანეზს" შორის დაწყებულ მოლაპარაკებებს, ჩვენ ამის შესახებ გვინდოდა გვეკითხა მედიაციაში ჩართული "ქართული ოცნების" პარლამენტის ადამიანის უფლებათა დაცვის კომიტეტის თავმჯდომარის, რატი იონათამიშვილისთვის, თუმცა, მან ჩვენს ზარებს ტრადიციულად არ უპასუხა.