ქუთაისიპოსტი

პანდემიის გამო 70 წელს ზევით გადაცილებულებისტვის აკრძალულია გარეთ  გასვლა.

ნელი ფხალაძე მარტო ცხოვრობს. 35 წლის ოჯახის ყველა წევრი დაკარგა. არც სხვა ვინმე ჰყავს ვინც მასზე იზრუნებს.

პანდემიური, დაძაბული ვითარების პირისპირ მარტო დარჩენილი ქალის შემოსავალი 220 ლარიანი პენსიაა. ის არც სოციალური შემწეობის მიმღებია. რაც იმით აიხსნება, რომ ქმრის დანატოვარი სახლი ქონებად ეთვლება. 

,,ქმარი თანამდებობის პირი იყო, მე პარიკმახერი. ორივე მშრომელები ვიყავით და ქალაქის ცენტრში ბინა ვიყიდეთ. ახლა ეს ბინა ყელზე მადგას. ამის გამო ჩემს გაჭირვებას არ სცნობს სახელმწიფო. ადრე მარტოხელობის დახმარებას ვღებულობდი, მერე ისიც მომიხსნეს. რა უნდა ვქნა? მე ვიშრომო? ვის რაში უნდა ჩემი ხელობა? ისედაც კარგა ხანია არაფერი მიხარია და არც არავინ მეიმედება."

ნელი, როგორც მარტოხელა ქალი მერიისგან ერთჯერადი პროდუქტების კალათის მიღებას ითხოვს. ამბობს, რომ ასე ცოტა ხნით  სურსათისთვის გარეთ გასვლას აარიდებს თავს და პენსიიდან ცოტაოდენ თანხასაც დაზოგავს.


საყოველთაო კარანტინის პირობებში ნელის მსგავსად, პურისა და შაქრის საყიდლად გაბედა გარეთ გამოსვლა 89 წლის თინამაც.

შარფით შეფუთულ ხანდაზმულს, სიარული უჭირდა. არც ბევრი საუბარი შეეძლო. მხოლოდ ის გვითხრა, რომ ოჯახის წევრები ჰყავს. ამის მიუხედავად, იძულებულია გარეთ გამოვიდეს. 

თინას ხელჯოხის გარეშე გადაადგილება არ შეუძლია

სხვებივით საკვების მოსაპოვებლადაა ქუჩაში ლიანაც. საპენსიო ასაკამდე ბევრი არ აკლია, თუმცა ჯერ პენსიის მიმღები არ არის. ამიტომ, საკვები რომ იყიდოს, ჯერ თავად უნდა გაყიდოს სოფლიდან ჩამოტანილი ყველი.  

წვიმიანი ამინდის გამო საწვიმარით, ნიღბით, რეზინის ჩექმებითა და ხელთთამანებით შეიარაღებულმა ძალიან დაღლილი სახით გვითხრა, რომ გარემოვაჭრეებთან მყიდველი აღარ მიდის.   

,,ხუთი - შვიდი საათი ზიხარ და  შეიძლება მხოლოდ ორმა ადამიანმა გკითხოს ყველის ფასი. იშვიათად იყიდოს. მე კი ვიცავ  წესებს, მაგრამ  შეშინებულია ხალხი და ცარიელი ქალაქი." 




ქუჩაში ყვავილების გაყიდვით ირჩენს თავს 72 წლის ნაზი. ამბობს, რომ მართალია კორონავირუსის ეშინია, მაგრამ არანაკლებ საშიშად მიაჩნია მხოლოდ პენსიის იმედზე დარჩენა. 

,,პენსიას შვილებს ვუნაწილებ. კი არიან ახალგაზრდები, მაგრამ სამსახურები აღარ აქვთ. ყვავილები კი ჩემთვის დამატებითი შემოსავალია, " -  თუმცა პროდუქტების მსგავსად, გარემოვაჭრეებს ყვავილების გაყიდვაც უჭირთ.



მერია ხანდაზმულებისთვის

მთავრობის დავალებით, იმისთვის რომ ხანდაზმულებს ქუჩაში გადაადგილება არ მოუწიოთ, ქუთაისის მერია გარკვეულ ღონისძიებებს ახორციელებს.

ხანდაზმულებს ადგილობრივი მუნიციპალიტეტი სოციალურ კალათას ურიგებს: ბურღულეულს, ფქვილს, შაქარს და კიდევ რამდენიმე არამალფუჭებად პროდუქტს.

მოხალისეები მათ ასევე შინ მიტანის სერვის სთავაზობენ. ამის მიუხედავდ, როგორც სჩანს აღნიშნული სერვისებით ჯერ ყველა მარტოდ დარჩენილმა ვერ ისარგებლა.

ქუთაისის მერიის ინფორმაციით, ამ დრომდე  600 - ზე მეტი ამანათი დაარიგეს. 

კერძო სექტორის მიერ შეგროვებული სასურსათო პროდუქტები, მერიის წარმომადგენლებთან ერთად მოხალისეებმა  70 წელს გადაცილებულ ხანდაზმულებს, მარტოხელა დედებს და მეორე მსოფილიო ომის ვეტერანებს დაურიგა.

ქუთაისის მუნიციპალიტეტის ინფორმაციითვე, სასურსათო პროდუქტების დარიგება ეტაპობრივად გაგრძელდება. (მათ შორის სასურსათო კალათა იმ მოქალაქესაც მიეწოდება, რომელიც ქუთაისიპოსტის მიერ მომზადებულ სტატიაში ითხოვს)