ქუთაისიპოსტი

ასოციაცია "ჭიათურელთა კავშირმა" სოფელ პერევისაში ე.წ "ნაფარცხევის" დახურულ კარიერზე, შპს "ჯორჯიან მანგანეზის" მიერ ჩატარებული სარეკულტივაციო სამუშაოების მონიტორინგი განახორციელა.

ორგანიზაციის ცნობით, რეკულტივაცია 10 000 კვ.მ ფართობს ჩაუტარდა, სადაც მანგანუმის შლამი შეიტანეს.

"პროექტის ერთ-ერთი მიმართულება რეკულტივაციის მონიტორინგია, რომელიც დაიწყო "ჯორჯიან მანგანეზმა" და გეგმავენ უფრო ფართო მასშტაბები მისცენ სამუშაოებს. მათი ცნობით, მალე დაიწყება რეკულტივაცია სოფელ ზედა რგანში, სადაც ნიადაგი კარიერული წესით გადაიხსნა, თუმცა, ჩვენი აქტიურობის შედეგად, კომპანიის მმართველმა სამუშაოები შეაჩერა," - ამბობს ასოციაცია "ჭიათურელთა კავშირის" ხელმძღვანელი, შოთა გაფრინდაშვილი.

შპს "ჯორჯიან მანგანეზში" კი ამბობენ, რომ სოფელ პერევისაში ე.წ "ნაფარცხევის" დახურულ კარიერის ტერიტორიაზე სასუქად მანგანუმის შლამი გამოიყენეს. თუმცა, კომპანიის აგრონომი, ავთო შეყილაძე განმარტავს, რომ მანგანუმის შლამის გამოყენებას დოზების დაცვა ჭირდება, რომ ზესმეტმა რაოდენობამ ზიანი არ მიაყენოს გარემოს.

"ამ ადგილზე ნიადაგში, ძირითადად, არის კვარცის ქვიშა. თუმცა, მიუხედავად ამისა აკაცია აქ კარგად ხარობს. ამის შემდგეგ ტერიტორია შემოიღობება და დავაკვირდებით როგორ გაიზრდება მცენარე იმ ადგილებში, სადაც მანგანუმის შლამი დიდი დოზითაა და იქ, სადაც ნაკლებია,"- განმარტავს შპს "ჯორჯიან მანგანეზის" რეკულტივაციის სამსახურის აგრონომი, ავთო შეყილაძე.

"ჭიათურელთა კავშირმა" მონიტორინგი პროექტის - "ახალგაზრდების და ქალების გაძლიერება და მათი ჩართვა ბუნებრივი რესურსების მართვაში ჭიათურის მუნიციპალიტეტში" ფარგლებში განახორციელა, რომლის მხარდამჭერი გლობალური გარემოსდაცვითი ფონდის მცირე გრანტების პროგრამა გახლავთ. პროექტი 2018 წლის მაისში დასრულდება.

"ჯორჯიან მანგანეზი", რომელიც ჭიათურის მუნიციპალიტეტში სამთო მოპოვებით სამუშაოებს ახორციელებს, 2013–2016 წლებში გარემოზე მიყენებული მავნე ზემოქმედებისთვის 357 282 133, 52 ლარით დააჯარიმა.

მიმდინარე წლის მაისში საქართველოს გარემოს დაცვის სამინისტროს ცნობით, შპს "ჯორჯიან მანგანეზში" სპეციალური მმართველი დანიშნეს. პოსტი საწარმოს ყოფილ წარმომადგენელს, ნიკოლოზ ჩიქოვანს ჩააბარეს.