ქუთაისიპოსტი

ქუთაისში, ბერძენაძის ქუჩაზე მცხოვრებლები გზის შეკეთებასა ითხოვენ.  ადგილობრივების თქმით, გზის საფარის პრობლემა  წლებია აწუხებთ.  

"ყოველი არჩევნების წინ მოდიოდნენ და გვპირდებოდნენ, რომ ამ პრობლემას მოაგვარებდნენ, მაგარმ საშველი მაინც არ დაადგა. ვინც არის ჩვენი  უბნის მაჟორიტარი დეპუტატი ის თვალითაც არავის გვინახავს, მუნიციპალიტეტშიც კი ვიყავით მისული და იქაც არ დაგვხვდა. ხალხი და პრობლემები მხოლოდ არჩევნებზე ახსენდებათ", - ამბობს ბერძენაძის ქუჩაზე მცხოვრები, ხათუნა სოფრომაძე. 

გზის საფარის პრობლემის გარდა, ბერძენაძის ქუჩაზე ღვარსადენების პრობლემაც აქვთ.  

"ჩვენთან არც ღვარსადენია მოწესრიგებული. ყოველი ძლიერი წვიმის შემდეგ სახლებში შემოგვდის წყალი", - განმარტავენ ადგილობრივები.


ამორტიზებული გზა

ბერძენაძის ქუჩა ძელქვიანის სამაჟორიტარო ოლქში შედის, რომლის მაჟორიტარი დეპუტატი კახი დვალიშვილია. ის ადასტურებს, რომ წინასაარჩევნოდ ბერძენაძის ქუჩის გზის საფარის მოწესრიგების დაპირება ნამდვილად გასცა. თუმცა, მისი თქმით, გზის შეკეთება ინფრაქტრუქტურის სამინისტრომ შეაჩერა, რადგან ქალაქში ჯერ საკანალიზაციო სისტემები უნდა გაიმართოს. დაპირების გაცემიდან  სამი წლის შემდეგაც ამბობს, რომ პრობლემა მოგვარდება. მაგრამ კონკრეტულად როდის, ამაზე დაზუსტებული პასუხი ჯერჯერობით არ აქვს, რადგან მისივე განმარტებით, ეს პროცესი წყლისა და საკანალიზაციო სისტემების მოწესრიგებაზეა დამოკიდებული.  

"წყლის ქსელის გამოცვლა მიმდინარეობს ახლა, შემდეგ უნდა მოხდეს კანალიზაციის ქსელის მოწყობაც. ამ ყველაფრის შემდე მოხდება გზის საფარის მოწესრიგება. მანამდე რომ დაგვეგო გზა ორმაგი ხარჯი გამოვიდოდა", - ამბობს კახი დვალიშვილი. 

ქუთაისში მიმდინარე წელს გზის საფარის რეაბილიტაცია რამდენიმე ქუჩაზე იგეგმება.