ქუთაისიპოსტი

საქართველოს ჯანდაცვის სამინისტროს 2016 წლის ნოემბრის მონაცემებით, იმერეთში შიდსით ინფიცირების 780 შემთხვევა დაფიქსირდა.

უწყების სტატისტიკის თანახმად, დაავადების გავრცელების კუთხით, ქვეყნის მასშტაბით იმერეთი მესამე ადგილზეა.

ინფექციური პათოლოგიის, შიდსის და კლინიკური იმუნოლოგიის სამეცნიერო პრაქტიკულ ცენტრის მონაცმებით, აივ ინფექციის ყველაზე მეტი 2 058 შემთხვევა თბილისშია რეგისტრირებული. მეორე ადგილზეა სამეგრელო. მიმდინარე წელს რეგიონში აივ ინფექციის 809 შემთხვევა დაფიქსირდა.

მეოთხე ადგილზეა კი აჭარა, სადაც 695 შემთხვევაა რეგისტრირებული.

2016 წლის მონაცემებით, საქართველოში შიდსით ინფიცირების 6038 შემთხვევაა რეგისტრირებული. ინფიცირებულთა შორის 4486 მამაკაცია, ხოლო 1552 ქალი.

პაციენტთა უმრავლესობა 29-დან 40 წლამდე ასაკობრივ ჯგუფს მიეკუთვნება.

შიდსი განუვითარდა 3354 პაციენტს, 1184 კი გარდაიცვალა.

ამ დროისთვის მაღალეფექტიან არვ მკურნალობაზე 3 550 პაციენტი იმყოფება, მათგან 401 აფხაზეთში.

ინფექციის გადაცემის გზებს შორის წამყვანი ნარკოტიკების ინექციური გზით მოხმარება (44.7%) და დაუცელი სქესობრივი კავშირებია (52.4%), მათ შორის 8.8% ჰომოსექსუალური კავშირი სახელდება.

ჯანდაცვის სამინისტროში აცხადებენ, რომ საქართველოში აივ/შიდსის როგორც პრევენციული, ისე მკურნალობის პროგრამების დიდი ნაწილი "შიდსთან, ტუბერკულოზსა და მალარიასთან ბრძოლის გლობალური ფონდის" მიერ ფინანსდება.

სახელმწიფო დაფინანსების ფარგლებში უზრუნველყოფილია: სამედიცინო სერვისების მიწოდება, დედიდან ბავშვზე ინფექციის გადაცემის პრევენციისა და უსაფრთხო სისხლის პროგრამების განხორციელება.

2015 წლიდან სახელმწიფომ უკვე თავის თავზე აიღო და განახორციელა არვ მკურნალობის პირველი რიგის მედიკამენტების შესყიდვა.

2016-2018 წლებში სახელმწიფო უზრუნველყოფს მნიშვნელოვანი თანხების მობილიზებას, რადგან "გლობალური ფონდის" დაფინანსება ამ პერიოდის შემდეგ შემცირდება.

1 დეკემბერი ჯანმრთელობის მსოფლიო ორგანიზაციამ (WHO) შიდსის მსოფლიო დღედ 1987 წელს გამოაცხადა.