ქუთაისიპოსტი

ქუთაისის მაჟორიტარი დეპუტატობის კანდიდატმა და "ნაციონალური მოძრაობის" ადგილობრივი ორგანიზაციის ხელმძღვანელმა გია თევდორაძემ, პარტიის სიის ოცეულში მე–19 ადგილიდან 63-ე ადგილზე გადაინაცვალა.
რის გამოც, ის 8 ოქტომბრის არჩევნების შედეგად, საქართველოს პარლამენტში ვერ მოხვდება.

ქუთაისიპოსტთან საუბარში გია თევდორაძე ირწმუნება, რომ მან "ნაციონალური მოძრაობის" პროპორციული სიის ოცეულიდან რიგით 63–ე ადგილზე საკუთარი ნებით გადაინაცვლა.

"მქონდა ასეთი განწყობა და ახლაც მაქვს, რომ თუკი მოვხვდები პარლამენტში, მოვხვდე მხოლო და მხოლოდ ქუთაისელების მიერ მოცემული მანდატის ლეგიტიმაციის პირობებში. ამ პრინციპის განხორცილების გამო, თავად განვაცხადე მზაობა ამოვსულიყავი სიის ოცეულიდან, რომელიც უპირობოდ იყო შესული საქართველოს პარლამენტში. ასე რომ, მთავარი ფსონი გავაკეთე მხოლოდ და მხოლოდ მაჟორიტარ დეპუტატობაზე," - განმარტავს გია თევდორაძე.

რაც შეეხება, მეორე ტურში მონაწილეობაზე, მისი განცხადებით, ეს გუნდის ერთობლივ გადაწყვეტილებაზეა დამოკიდებული, რომელსაც "ნაციონალური მოძრაობა" მიმდინარე წლის 11 ოქტომბერს მიიღებს.

გია თევდორაძე 2016 წლის 8 ოქტომბრის საპარლამენტო არჩევნებში ქუთაისის #47 საარჩევნო ოლქში მაჟორიტარი დეპუტატობის კანდიდატობაზე იყრიდა კენჭს.

ცენტრალური საარჩევნო კომისიის მონაცემებით, მან არჩევნებში 6644 ხმა მიიღო, რაც ამომრჩეველთა საერთო რაოდენობის 29,43%-ია.

ქუთაისის #47-ე ოლქში სულ 22 573 ამომრჩეველი იყო რეგისტრირებული. 

ცესკოს მონაცემით, იმის გამო ვერც ერთმა კანდიდატმა ზღვარი ვერ გადალახა ქუთაისის სამივე მაჟორიტარულ ოლქში მეორე ტური დაინიშნება.