ქუთაისიპოსტი

"საერთაშორისო გამჭვირვალობა-საქართველოს" ინფორმაციით, დასავლურმა სამყარომ „ქართული ოცნების“ უკვე 200-ზე მეტი წარმომადგენელი დაასანქცირა, რომელთაგან 98-ის ვინაობა გასაჯაროვდა, ხოლო დანარჩენებზე ანონიმური სავიზო შეზღუდვებია დაწესებული.

ორგანიზაცია დასავლეთის მიერ დასანქცირებულ პირთა სიას აქვეყნებს და  განმარტავს, რომ დემოკრატიული ქვეყნები ამ პირებს მშვიდობიანი მომიტინგეების სასტიკი დარბევის, დემოკრატიისთვის ძირის გამოთხრის, ევროინტეგრაციის პროცესის შეჩერების, საქართველოში რუსული ინტერესების გატარების, არჩევნების გაყალბების, კორუფციის, პროპაგანდის და ქართველი ხალხის ნების წინააღმდეგ წასვლის გამო ასანქცირებენ.

"შეერთებულმა შტატებმა დააწესა დამატებით სავიზო შეზღუდვები 100-ზე პირზე, მათ შორის არიან: პარტია „ქართული ოცნების“ წევრები, პარლამენტის წევრები, ცენტრალური და მუნიციპალური ხელისუფლების მაღალჩინოსნები, სამართალდამცავ და უსაფრთხოების ორგანოების მაღალჩინოსნები, კორუმპირებული ბიზნეს ლიდერები, პროპაგანდისტები, ზოგიერთი კერძო მოქალაქე და ყველა ამ პირის ოჯახის წევრები. ამ პირების სახელები არ გასაჯაროებულა სავიზო კონფიდენციალურობის კანონმდებლობის გამო.

ლატვიამ, 2024 წლის 20 დეკემბერს, საქართველოს 13 მოქალაქეზე დამატებითი სანქციები (სამოგზაურო შეზღუდვები) გამოაცხადა, თუმცა, მათ ამ პირების ვინაობა ჯერ არ დაუკონკრეტებიათ.

2025 წლის 3 მარტს, ბალტიის ქვეყნებმა, ჯამში 145 პირს დაუწესეს სამოგზაურო შეზღუდვა. ლიეტუვა და ლატვიის მიერ დასაქნცირებული 90 პირის ვინაობა უცნობია, ხოლო ესტონეთის მიერ დასანქცირებული დარჩენილი 55 პირის ვინაობა აღბეჭდილია საინფორმაციო ბარათზე.

სანქციები დააწესა გერმანიამაც. 2024 წლის 31 დეკემბერს, ქვეყანაში შესვლა აეკრძალა საქართველოს 9 მოქალაქეს, რომლებიც „პასუხისმგებელნი არიან საქართველოში მომიტინგეებისა და ოპოზიციის წარმომადგენლების მიმართ ძალადობაზე“. მათი ვინაობა ამ დროისთვის არ არის ცნობილი. 2025 წლის 24 მარტს, გერმანიამ დამატებითი დააწესა სამოგზაურო შეზღუდვები, თუმცა სანქცირებულთა რაოდენობა და ვინაობა უცნობია",- აღნიშნულია TI-ის განცხადებაში. 

"საერთაშორისო გამჭვირვალობა საქართველოს" ინფორმაციით, 2025 წლის 13 თებერვალს, ევროპარლამენტმა მიიღო კიდევ ერთი კრიტიკული რეზოლუცია, რომლითაც არ ცნობს "ქართული ოცნების" თვითგამოცხადებულ ხელისუფლებას, მოუწოდებს მას შეწყვიტოს ძალადობრივი რეპრესიები და დანიშნოს ახალი არჩევნები. TI-ის ცნობით, რეზოლუცია ასევე მოუწოდებს ევროკავშირის წევრ ქვეყნებს გაუყინოს აქტივები და პერსონალურად დაასაქნციროს ბიძინა ივანიშვილი, მისი ოჯახი, "ოცნების" მაღალჩინოსნები, ბიზნეს და სახელმწიფო სტრუქტურების გარემოცვა და პროპაგანდისტები. 

ორგანიზაციის ცნობით, მთლიანობაში, ევროპარლამენტის რეზოლუცია 31 ადამიანის დასანქცირებას ითხოვს:

ბიძინა ივანიშვილი და მისი ოჯახის წევრები: მეუღლე ეკატერინე ხვედელიძე და შვილები უტა, ცოტნე, ბერა და გვანცა ივანიშვილები; ძმა ალექსანდრე ივანიშვილი; დის შვილი შმაგი კობახიძე; დეიდაშვილი უჩა მამაცაშვილი.

„ქართული ოცნების“ წარმომადგენლები: ირაკლი კობახიძე, შალვა პაპუაშვილი, კახა კალაძე, ირაკლი ღარიბაშვილი;

შინაგან საქმეთა მინისტრი: ვახტანგ გომელაური;

სახელმწიფო უსაფრთხოების სამსახურის ხელმძღვანელი: გრიგოლ ლილუაშვილი;

ეროვნული ბანკის პრეზიდენტი: ნათია თურნავა;

ბიზნესმენები: ივანე ჩხარტიშვილი, სულხან პაპაშვილი, გიორგი კაპანაძე;

აჭარის მთავრობის თავმჯდომარე: თორნიკე რიჟვაძე;

ბიზნესმენი და „ქართული ოცნების“ ყოფილი დეპუტატი: ილია წულაია;

კომუნიკაციების კომისიის თავმჯდომარე და ბიზნესმენი: კახი ბექაური;

„ქართული ოცნების“ პროპაგანდისტი: ლაშა ნაცვლიშვილი;

საზოგადოებრივი მაუწყებლის სამეურვეო საბჭოს თავმჯდომარე: ვასილ მაღლაფერიძე; გენერალური დირექტორი: თინათინ ბერძენიშვილი;

მოსამართლეები: მიხეილ ჩინჩალაძე და ლევან მურუსიძე;

ტელეკომპანია „იმედისა“ და „ლიბერთი ბანკის“ თანამფლობელი: ირაკლი რუხაძე;

ავიაკომპანია „ჯორჯიან ეარვეისის“ მფლობელი: თამაზ გაიაშვილი;

ბიზნესმენები და „ქართული ოცნების“ დეპუტატები: ანტონ ობოლაშვილი და გოჩა ენუქიძე.