ქუთაისიპოსტი

"ქართულის ოცნების" პარლამენტმა დღეს უკვე მესამე მოსმენით რამდენიმე კანონი მიიღო.

მედიისა და არასამთავრობო ორგანიზაციების შემზღუდავი კანონები. კანონებიდან ამოიღეს სიტყვა „გენდერი“, სამაგიეროდ დააბრუნეს „სამშობლოს ღალატის“ მუხლი.

"ქართული ოცნების" წევრებმა ასევე მიიღეს "უცხოეთის აგენტების რეგისტრაციის აქტი", - რასაც საფუძვლად ამერიკული FARA დაედო.

„ეს არის წინა რუსული კანონის გამკაცრება“, - ასე უწოდებს იურისტი საბა ბრაჭველი FARA-ს "ქართული ოცნების" პარლამენტის მიერ მიღებულ ვერსიას. 

„ყველა ფიზიკური პირი, არასამთავრობო ან მედია ორგანიზაცია, რომელსაც უცხოურ ორგანიზაციასთან ან პირთან კონტრაქტი გააჩნია და/ან შემოსავალს იღებს, ვალდებული იქნება, დაექვემდებაროს სპეციალურ კონტროლს, პერსონალური მონაცემების გასაჯაროებას, მოიხსენიოს თავი, როგორც "აგენტი" საზოგადოებასთან/საჯარო ორგანოებთან ინტერაქციის დროს და შეასრულოს სხვა ვალდებულებები. კიდევ ერთხელ: ეს არ არის ამერიკული ფარა, რომელიც დამოუკიდებელ ადამიანებს, მედიასა და სამოქალაქო სექტორს არ ერჩის, ეს არის წინა რუსული კანონის გამკაცრება“, - აღნიშნავს საბა ბრაჭველი.

ვის ეხება "ოცნების" FARA ?

სპეციალისტების განმარტებით, FARA ეხება არასამთავრობო ორგანიზაციებს (NGO), მედიასაშუალებებს და კერძო კომპანიებს, თუ მათი დაფინანსების 20%-ზე მეტი უცხოური წყაროდან მოდის;

პირები, რომლებიც უცხოური ორგანიზაციების დავალებით ან დაფინანსებით აწარმოებენ საზოგადოებრივ-პოლიტიკურ საქმიანობას (მაგალითად, ლობისტები, მრჩეველები, სარეკლამო აგენტები, ჟურნალისტები, რომლებიც პირდაპირ ან ირიბად უცხოური ორგანიზაციების მიერ არიან დასაქმებულნი);

ფიზიკური პირები, თუ ისინი ასრულებენ "უცხოური პრინციპალის" (ანუ უცხო ქვეყნის, უცხოური პოლიტიკური პარტიის, საერთაშორისო ორგანიზაციის ან სხვა უცხოური სუბიექტის) დავალებებს, მათ ინტერესებში პოლიტიკურად აქტიურობენ ან ინფორმაციის გავრცელებას ახდენენ.

ბიზნესები, რომლებიც არაპირდაპირ უკავშირდებიან უცხოური დაფინანსების წყაროებს, მათ შორისაა საინფორმაციო და საკონსულტაციო კომპანიები;

პროექტის თანახმად, უცხოურ აგენტად რეგისტრაციას დაავალდებულებენ არა მხოლოდ არასამთავრობო და მედია ორგანიზაციებს, არამედ მეწარმეებს, კორპორაციებს და ფიზიკურ პირებსაც კი, რომლებიც იღებენ უცხოეთიდან თანხებს, უცხოურ დაფინანსებას და ერთვებიან საზოგადოებრივ, პოლიტიკურ თუ ინფორმაციულ საქმიანობაში.

ამერიკულ FARA-ში სანქცია 10 000 დოლარი და/ან თავისუფლების აღკვეთაა, რაც საქართველოში 10 000 ლარი და თავისუფლების აღკვეთით ჩანაცვლდა.

FARA-ს გარდა „ოცნების“ პარლამენტით ცვლილებები შევიდა მაუწყებლობის კანონში, - მკაცრდება მედიის კონტროლი და სადამსჯელო ზომები და  სრულად იკრძალება მაუწყებლების უცხოური დაფინანსება.

• უქმდება კანონშემოქმედებით პროცესში არასამთავრობო ორგანიზაციების ჩართულობის ვალდებულება;
• კანონებიდან ქრება სიტყვა "გენდერი";
• „ოცნების“ პარლამენტმა  სისხლის სამართლის კოდექსში დააბრუნა "სამშობლოს ღალატის" მუხლი, რომელიც 2007 წელს გაუქმდა;

„ოცნების“ პარლამენტი კანონებს ხელმოსაწერად მიხეილ ყაველაშვილს გადაეგზავნება.

როგორც სპეციალისტები განმარტავენ ყაველაშვილის მიერ ხელმოწერის შემდეგ, კანონის საკანონმდებლო მაცნეზე გამოქვეყნებისთანავე ამოქმედდება სამი კანონი:

• ცვლილებები მაუწყებლობის შესახებ კანონში;
• "გენდერული თანასწორობის" შესახებ კანონში ცვლილებები, რითაც ეს ტერმინი ქრება;
• არასამთავრობოების ჩართულობის საკითხი.

მათგან განსხვავებით "უცხოეთის აგენტების რეგისტრაციის აქტს", - ეს კანონი ძალაში შედის მიხეილ ყაველაშვილის მიერ ხელმოწერიდან მე-60 დღეს.