ქუთაისიპოსტი

წინა წლის ანალოგიურ პერიოდთან შედარებით საქართველოს საერთაშორისო რეზერვები 999 მილიონი დოლარით შემცირდა.

ინფორმაციას BM.GE ავრცელებს.

მიუხედავად იმისა, რომ 2024 წლის ნოემბერში საქართველოს ოფიციალური საერთაშორისო რეზერვების მოცულობა 39 მილიონი დოლარით, 4,123,893,700 დოლარამდე გაიზარდა.

გასულ თვეში ზრდის ძირითადი განმაპირობებელი ფაქტორი ეროვნული ბანკის მიერ Bmatch პლატფორმით 124.5 მილიონი დოლარის შესყიდვა გახდა.

სამაგიეროდ ოქტომბერში ეროვნულმა ბანკმა რეკორდული მასშტაბის 591 მილიონი დოლარის მოცულობის სავალუტო რეზერვები გაყიდა, რამაც საერთაშორისო რეზერვების 4.08 მილიარდ დოლარამდე შემცირება განაპირობა. ამ კლების ფონზე, განსაკუთრებით აქტუალური გახდა სავალუტო რეზერვების შევსება.

ნოემბრის მდგომარეობით სავალუტო რეზერვების მოცულობაზე გავლენა მოახდინა ოქროს ფასმაც, რომელიც შემცირდა. თუკი ოქტომბრის მდგომარეობით, საქართველოს სავალუტო რეზერვებში არსებული 7.1 ტონა ოქრო 627 მილიონი დოლარი ღირდა, ნოემბრის მდგომარეობით მისი ფასი 608 მილიონ დოლარამდე შემცირდა. რომ არა ეს კლება, საქართველოს სავალუტო რეზერვები გასულ თვეში 39 მილიონის ნაცვლად 58 მილიონი დოლარით გაიზრდებოდა.

ეროვნული ბანკის მიერ 2024 წლის 11 თვეში განხორციელებული სავალუტო ინტერვენციების დეტალური სტატისტიკა ასე ნაწილდება:
• იანვარი - შესყიდვა $8.1 მილიონი Bmatch;
• თებერვალი - შესყიდვა $77.5 მილიონი Bmatch-ით;
• მარტი - შესყიდვა $127.9 მილიონიBmatch-ით;
• აპრილი - შესყიდვა $73.1 მილიონი Bmatch-ით;
• მაისი - გაყიდვა $108.7 მილიონი აუქციონით და გაყიდვა $9.1 მილიონიBmatch-ით;
• ივნისი - გაყიდვა $60 მილიონი აუქციონით და გაყიდვა $42 მილიონი Bmatch-ით;
• ივლისი - შესყიდვა $1.9 მილიონი Bmatch-ით;
• აგვისტო - შესყიდვა $41 მილიონი Bmatch-ით;
• სექტემბერი - გაყიდვა $106.5 მილიონი Bmatch-ით;
• ოქტომბერი - გაყიდვა $213.4 მილიონი აუქციონით და გაყიდვა $377.7 მილიონი Bmatch-ით.
• ნოემბერი - შესყიდვა Bmatch-ით 124.5 მილიონი დოლარის ოდენობით.
ეროვნული ბანკის პრეზიდენტის მოვალეობის შემსრულებლის, ნათია თურნავას განცხადების შესაბამისად, 2024 წელს სებ-ის მთლიანი გაყიდვები იყო 917 მილიონი დოლარი, ხოლო შესყიდვები 453 მილიონი დოლარი იყო, რაც წმინდა 464 მილიონი დოლარის გაყიდვების ტოლია.