ქუთაისიპოსტი

ევროკავშირთან მოლაპარაკებების შეჩერების გასაპროტესტებლად და რიგგარეშე არჩევნების დანიშვნის მოთხოვნით, ქუთაისელები დღეს, 16:00 საათიდან ისვე შეიკრიბებიან.

ქუთაისში პროტესტი არ წყდება. აქტივისტები ქალაქის ცენტრალურ ნაწილში ყოველდღიურად იკრიბებიან და "ქართული ოცნების" მიერ არჩევნების გაყალბებას და საგარეო კურსის ცვლილებას აპროტესტებენ. დემონსტრანტები ვადამდელი არჩევნების ჩატარებას ითხოვენ.

ქუთაისში აქციებს უმეტესად მშვიდობიანი ხასიათი აქვს, თუმცა, განსხვავებული იყო პირველი დღე, 28 ნოემბერი, როცა აქციის ერთ-ერთი ორგანიზატორი მიხეილ მუმლაძე პოლიციამ ასფალტზე ათრია და ძალადობრივი მეთოდებით დააკავა. მიხეილ მუმლაძეს ოჯახის წევრები რამდენიმე საათის განმავლობაში ეძებდნენ, ბოლოს იგი სამტრედიის პოლიციის დროებითი მოთავსების იზოლატორში აღმოჩნდა. სამოქალაქო აქტივისტი 48 საათში გაათავისუფლეს, თუმცა, ქუთაისის საქალაქო სასამართლოში მისი საქმის განხილვა არ დასრულებულა. გამოძიება მიხეილ მუმლაძეს პოლიციის მოთხოვნისადმი დაუმორჩილებლობას ედავება. მორიგი პროცესი 20 დეკემბერსაა ჩანიშნული.

უწყვეტი პროტესტი მიმდინარეობს ქვეყნის მასშტაბით. მოქალაქეები რიგგარეშე არჩევნების დანიშვნას მოითხოვენ თავიანთ ქალაქებსა და ადმინისტრაციულ ცენტრებში. აქციის მონაწილეებს სასტიკი მეთოდებით უსწორდება სპეციალური დანიშნულების რაზმი დედაქალაქში. დემონსტრანტებს სცემენ დაკავების დროს და როგორც ისინი ჰყვებიან, დაკავების შემდეგაც. ფიზიკურად უსწორდებიან მედიის წარმომადგენლებს. აქციების დროს დაშავდა და მძიმე დაზიანება მიიღო ასობით დემონსტრანტმა და ათობით ჟურნალისტ-ოპერატორმა. ერთ-ერთმა სპეცრაზმმელმა პირდაპირ ეთერში სცემა ტელეკომპანია "ფორმულას" ჟურნალისტს გურამ როგავას, რის შედეგადაც მან სახისა და ხერხემლის დაზიანებები მიიღო. გუშინ, 2 დეკემბრის აქციაზე სასტიკად ნაცემი 22 წლის ახალგაზრდა ამ დრომდე კომატოზურ მდგომარეობაშია.

საქართველოში საპროტესტო ტალღა, რომელიც ყოველდღიურად უფრო მზარდი ხდება, 28 ნოემბერს, მას შემდეგ დაიწყო, რაც "ქართული ოცნების" პრემიერ-მინისტრმა ირაკლი კობახიძემ განაცხადა, რომ ქვეყანა ევროკავშირში ინტეგრაციის პროცესს 2028 წლამდე აჩერებს.