ქუთაისიპოსტი

ქუთაისის საერთაშორისო უნივერსიტეტის სტუდენტების ნაწილი 26 ოქტომბრის არჩევნების შედეგებს არ ეთანხმება და გაყალბებული არჩევნების წინააღმდეგ ქვეყანაში მიმდინარე პროტესტს უერთდება.

სტუდენტები ამბობენ, რომ ყოველთვის იდგებიან იქ, სადაც თავისუფალი საქართველო დგას. 

„ჩვენ, ქუთაისის საერთაშორისო უნივერსიტეტის სტუდენტები, მხარდაჭერას ვუცხადებთ ბათუმის, თბილისისა და ყველა სხვა ქალაქის სტუდენტებს მიმდინარე პროტესტში. ჩვენ არ ვაღიარებთ 26 ოქტომბერს ჩატარებული არჩევნების ლეგიტიმურობას და სხვა სტუდენტებთან ერთად, ბოლომდე ვიბრძოლებთ გაყალბებული არჩევნების წინააღმდეგ. ყოველთვის ვიდგებით იქ, სადაც დგას თავისუფალი საქართველო“, - აღნიშნულია KIU-ს სტუდენტების ნაწილის განცხადებაში. 

ქუთაისის საერთაშორისო უნივერსიტეტი ბიძინა ივანიშვილის ფონდ "ქართუს" დაფინანსებით აშენდა. KIU-ს სტუდენტები ქუთაისსა და დედაქალაქში მთავრობის მიერ "რუსული კანონის" ინიცირებასა თუ შემდეგ მიღებას აქტიურად აპროტესტებდნენ.

საპარლამენტო არჩევნები, 26 ოქტომბერს, მასობრივი დაშინებისა და მოსყიდვის ფონზე ჩატარდა. 16 ნოემბერს კი ცენტრალურმა საარჩევნო კომისიამ საპარლამენტო არჩევნების შემაჯამებელი ოქმი დაამტკიცა, რომლის თანახმადაც, „ქართულმა ოცნებამ“ ამომრჩეველთა 53.93%-იანი მხარდაჭერა მიიღო და პარლამენტში 89 მანდატით იქნება წარმოდგენილი.

26 ოქტომბრის არჩევნების შედეგებს მხოლოდ სახელისუფლებო პარტია აღიარებს. არჩევნების შედეგებს არ ცნობს ოპოზიცია, არასამთავრობო სექტორი და მოსახლეობის, მათ შორის სტუდენტების, უმრავლესობა.

გუშინ, 17 ნოემბერს, ოპოზიციამ უწყვეტი პროტესტი დაანონსა და მოქალაქეებმა ღამე კარვებში გაათენეს. პროტესტის შემდგომ სტრატეგიას ოპოზიციის ლიდერები, დღეს, 18 ნოემბრის საღამოს, გამოაცხადებენ.

ფოტო: არქივი