ქუთაისიპოსტი

შინაგან საქმეთა სამინისტრომ, ცესკოს მიმართვის საფუძველზე, გამოძიება, სსკ-ის 118-ე მუხლით დაიწყო, რაც ჯანმრთელობის განზრახ ნაკლებად მძიმე დაზიანებას გულისხმობს.

საქმე ეხება „ენმ“-ის წევრ დავით კირთაძის მიერ ცესკოს თავმჯდომარე გიორგი კალანდარიშვილისთვის შავი სითხის შესხმას.

როგორც შსს-ს განცხადებაშია აღნიშნული, გიორგი კალანდარიშვილს დავით კირთაძემ ამ დროისთვის დაუდგენელი თხევადი სითხე შეასხა. 

"ფაქტთან დაკავშირებით მიმდინარეობს გამოძიება და გამოძიების მსვლელობისას ჩატარდება ყველა შესაბამისი საგამოძიებო მოქმედება",- აცხადებენ შსს-ში.

სხდომაზე, სადაც კომისია 26 ოქტომბრის საპარლამენტო არჩევნების შედეგებს აჯამებდა, კირთაძესა და კალანდარიშვილს შორის სიტყვიერი კამათი დაიწყო, რა დროსაც ცესკოს თავმჯდომარემ ოპოზიციონერ წევრს მიკროფონი გაუთიშა. ამის შემდეგ, კირთაძემ გიორგი კალანდარიშვილს სახეში შავი საღებავი შეასხა. "შენ ხარ ჩვენი ქვეყნის სირცხვილი, შენ ხარ შავი ლაქა", - მიმართა მან კომისიის თავმჯდომარეს.

სხდომაზე შესვენება გამოცხადდა, რის შემდეგაც გიორგი კალანდარიშვილმა სხდომა ახვეული თვალით გააგრძელა.

ცესკომ არჩევნების შემაჯამებელი ოქმი დაამტკიცა და „ქართული ოცნებას“ - 53.93% დაუწერა. 

26 ოქტომბრის არჩევნების შედეგებს მხოლოდ სახელისუფლებო პარტია აღიარებს. ცესკოს შედეგებით, მე-11 მოწვევის პარლამენტში, “ქართულმა ოცნებამ” 150-დან 89 მანდატი მოიპოვა, ხოლო ოთხ ოპოზიციურ პლატფორმას, ჯამში - 61 მანდატი აქვს.

ოპოზიცია აცხადებს, რომ არჩევნები გაყალბდა. მათი თქმით, არჩევნების დღეს, ბიულეტენებზე საარჩევნო სუბიექტის ნომრის გაფერადების შემდეგ, მელნის კვალი ბიულეტენის მეორე მხარეს ჩანდა, რითაც მასობრივად დაირღვა ამომრჩევლის ხმის ფარულობა. ამის შემდეგ, შავი წრე მოქალაქეების მიერ პროტესტის გამოხატვის სიმბოლოდ იქცა. ოპოზიციაში ამბობენ, რომ კირთაძის მიერ საღებავის შესხმაც ამ დარღვევის მიმართ პროტესტს გამოხატავდა.