ქუთაისიპოსტი

ზესტაფონის ფეროშენადნობთა ქარხანა, დღეიდან, 1-ელი ნოემბრიდან, საწარმოო სიმძლავრეებს თიშავს და ფეროშენადნობების წარმოების პროცესს აჩერებს.


"ჯორჯიან მანგანეზში", რომელიც საწარმოში 100%-იანი წილის მფლობელია, წარმოების პროცესის შეწყვეტას მსოფლიო ბაზარზე სილიკომანგანუმის ფასების მკვეთრი ვარდნისა და მოთხოვნის შემცირების მიზეზით ხსნიან. ასევე, აცხადებენ, რომ გართულებულ პირობებს თან დაერთო მადნის დეფიციტი, რაშიც სოფელ შუქრუთში მიმდინარე პროტესტის მონაწილეებს ადანაშაულებენ. 

"ჩვენმა კონტრაქტორმა "ჭიათურა მენჯმენტ კომპანიამ", ადგილობრივი მოსახლეობის მიერ, 8 თვის განმავლობაში, მაღაროების პიკეტირების გამო, ვერ უზრუნველყო ქარხნის მადნით მომარაგება. 12-დან 7 მაღაროს პარალიზებით ჭიათურაში მადნის მოპოვება 70%-ით შემცირდა.

ფეროშენადნობების მსოფლიო ბაზარზე შექმნილი კრიზისის გამო, სილიკომანგანუმის წარმოება ჯერ კიდევ 2 ოქტომბრიდან შევამცირეთ. აღსანიშნავია ისიც, რომ ბოლო ერთი თვის განმავლობაში, ჩვენს მთავარ საექსპორტო ბაზარზე აშშ-ში აღარ მომხდარა ფეროშენადნობების რეალიზაცია. მიუხედავად შექმნილი ვითარებისა, ვიმედოვნებთ, რომ გლობალურ ბაზრებზე მდგომარეობა მალე გამოსწორდება და შევძლებთ სამუშაო პროცესის დათქმულ ვადაზე ადრე აღდგენას",- აღნიშნულია "ჯორჯიან მანგანეზის" განცხადებაში. 

კომპანიაში აცხადებენ, რომ წარმოების პროცესი პირველ მარტამდე იქნება შეჩერებული და ამ პირობებში, თანამშრომლებს ხელფასის მხოლოდ 60%-ს გადაუხდიან. 

ამასთან, განმარტავენ, რომ შეუნარჩუნებენ სადაზღვეო პაკეტს, თანამშრომლების იმ ნაწილს კი, რომლებიც მიმდინარე და დაგეგმილ კაპიტალურ სარემონტო სამუშაოებში ჩაერთვებიან, ხელფასის 100%-ს აუნაზღაურებენ.

ზესტაფონის ფეროშენადნობთა ქარხნის მსგავსად, მუშაობა გააჩერა ჭიათურის მაღარომაც. "ჯორჯიან მანგანეზი" საწარმოო პროცესის შეჩერებას, ამჯერადაც სოფელ შუქრუთის მოსახლეობის პროტესტის შედეგად წარმოშობილ ფინანსურ კრიზისს აბრალებს.

საწარმოების მუშაოების შეჩერებასთან დაკავშირებით ინფორმაცია გუშინ, 31 ოქტომბერს, გავრცელდა.

სოფელ შუქრუთში უწყვეტი პროტესტის 236-ე დღეა. მოსახლეობა "ჯორჯიან მანგანეზის" მიერ მანგანუმის მოპოვების შედეგად, მათი საცხოვრებელი სახლების დაზიანებას აპროტესტებს და ზარალის შესაბამის კომპენსაციას ითხოვს. ამ ხნის მანძილზე, სოლიდარობის ნიშნად, შუქრუთში არსებული ყველა ვახტა და მაღარო გაჩერებული იყო.

„ჯორჯიან მანგანეზი“ საქართველოში უმსხვილესი სამთო-მომპოვებელი და ფეროშენადნობების მწარმოებელი კომპანიაა, რომელიც 2006 წლიდან ოპერირებს.

კომპანიის შემადგენლობაში შედის ჭიათურის სამთო-გამამდიდრებელი კომპლექსი, სადაც მანგანუმის მადნის მოპოვება ხდება; ზესტაფონის ფეროშენადნობთა ქარხანა, რომელიც კომპანიის საბოლოო პროდუქტს – სილიკომანგანუმს აწარმოებს და „ვარციხეჰესი“, სრულად განახლებად ენერგიაზე მომუშავე ჰიდროელექტროსადგური, რომლის მიერ გამომუშავებული ენერგიაც უზრუნველყოფს მოპოვება-წარმოების პროცესს.


ამავე თემაზე:

რატომ აჩერებს ჭიათურის მაღარო მუშაობას - "ჯორჯიან მანგანეზი" შუქრუთის მოსახლეობას ადანაშაულებს

ზესტაფონის ფეროშენადნობი ქარხანა და ჭიათურის მაღარო მუშაობას წყვეტს