ქუთაისიპოსტი

"ჯორჯაინ მანგანეზი" ჭიათურაში საწარმოო პროცესს აჩერებს და ამას სოფელ შუქრუთის მოსახლეობის პროტესტის შედეგად წარმოშობილ ფინანსურ კრიზისს აბრალებს.

კომპანიის მიერ გავრცელებულ ოფიციალურ განცხადებაში ნათქვამია, რომ მარტის თვიდან კომპანიას შუქრუთის მოსახლეობის პროტესტის გამო იძულებით მოუწია წარმოების 70%-ის შეჩერება, რასაც დაემატა მსოფლიო ბაზარზე მადანზე ფასის კლების ტენდენცია და ამასთან დამატებით მოძიებული დაფინანსების საშუალებების ამოწურვა.

"აღსანიშნავია, რომ ამ მძიმე პირობებში, როდესაც საწარმოების დიდი ნაწილი გაჩერებული იყო, კომპანია თანამშრომლებს სრულად უხდიდა ხელფასის 100%-ს. შიდა და გარე ფაქტორებმა, ჭიათურის საწარმოებში მძიმე ფინანსური კრიზისი შექმნა, რის გამოც კომპანიას იძულებით მოუწია სპეციალური რეჟიმის ამოქმედება",- აღნიშნულია "ჯორჯიან მანგანეზის" განცხადებაში. 

კომპანიაში აცხადებენ, რომ საწარმოო პროცესი მომდევნო 4 თვის განმავლობაში იქნება შეჩერებული, ამ პერიოდში კი ეცდებიან, შეიმუშაონ და კანონით გათვალისწინებულ ყველა მხარესთან შეათანხმონ კრიზისის დაძლევის გეგმა.

"გეგმის შემუშავება და შემდეგ მისი აღსრულება საჭიროა იმისათვის, რომ საწარმოების ფინანსური მდგომარეობა გაუმჯობესდეს, მადნის მოპოვება რენტაბელური გახდეს და ადგილი აღარ ჰქონდეს სამუშაო პროცესის პერმანენტულ, უკანონო შეჩერებებს",- აცხადებენ "ჯორჯიან მანგანეზში". 

აღნიშნულ პირობებში, კომპანია თანამშრომლებს ხელფასის 60%-ის ანაზღაურებასა და მოქმედი სადაზღვევო საოჯახო პაკეტის შენარჩუნებას სთავაზობს.

ჭიათურის მაღაროსთან ერთად, მუშაობა შეაჩერა ზესტაფონის ფეროშენადნობმა ქარხანამაც, რომლის 100%-იანი წილის მფლობელიც ასევე "ჯორჯიან მანგანეზია".

საწარმოების მუშაოების შეჩერებასთან დაკავშირებით ინფორმაცია გუშინ, 31 ოქტომბერს, გავრცელდა. 

სოფელ შუქრუთში უწყვეტი პროტესტის 236-ე დღეა. მოსახლეობა "ჯორჯიან მანგანეზის" მიერ მანგანუმის მოპოვების შედეგად, მათი საცხოვრებელი სახლების დაზიანებას აპროტესტებს და ზარალის შესაბამის კომპენსაციას ითხოვს. ამ ხნის მანძილზე, სოლიდარობის ნიშნად, შუქრუთში არსებული ყველა ვახტა და მაღარო გაჩერებული იყო. 

„ჯორჯიან მანგანეზი“ საქართველოში უმსხვილესი სამთო-მომპოვებელი და ფეროშენადნობების მწარმოებელი კომპანიაა, რომელიც 2006 წლიდან ოპერირებს.

კომპანიის შემადგენლობაში შედის ჭიათურის სამთო-გამამდიდრებელი კომპლექსი, სადაც მანგანუმის მადნის მოპოვება ხდება; ზესტაფონის ფეროშენადნობთა ქარხანა, რომელიც კომპანიის საბოლოო პროდუქტს – სილიკომანგანუმს აწარმოებს და „ვარციხეჰესი“, სრულად განახლებად ენერგიაზე მომუშავე ჰიდროელექტროსადგური, რომლის მიერ გამომუშავებული ენერგიაც უზრუნველყოფს მოპოვება-წარმოების პროცესს.


ამავე თემაზე:

ზესტაფონის ფეროშენადნობი ქარხანა და ჭიათურის მაღარო მუშაობას წყვეტს