ქუთაისიპოსტი

"ერთიანობა - ნაციონალური მოძრაობის" ერთ-ერთმა ლიდერმა, ხატია დეკანოიძემ საკუთარი არჩევანი ქუთაისში, #64 საარჩევნო უბანზე დააფიქსირა.
მან ამომრჩევლებს საარჩევნო უბნებზე მისვლისკენ მოუწოდა.

"დღეს არის უმნიშვნელოვანესი დღე საქართველოს უახლეს ისტორიაში, ძალიან იშვიათად გვაქვს ჩვენ ისეთი დღეები, როდესაც წყდება საქართველოს მომავალი და დღეს არის სწორედ ის დღე, რამაც უნდა განსაზღვროს მომავალი ათწლეულები. ამიტომ, ყველა ვართ ისტორიული პროცესის მონაწილეები. ყველას მინდა ვთხოვო, რომ საქართველოს მომავლისთვის, ჩვენი შვილების მომავლისთვის, მივიდნენ უბნებზე და დააფიქსირონ საკუთარი ხმა. ჩვენი ხმა შეიძლება აღმოჩნდეს გადამწყვეტი", - განაცხადა ხატია დეკანოიძემ.

ქუთაისში საარჩევნო უბნები დილის რვა საათზე გაიხსნა. ძლიერი წვიმის მიუხედავად, უბნებთან ამომრჩევლების რიგებია.

ქუთაისში 72 საარჩევნო უბანი და 152 506 ამომრჩეველია რეგისტრირებული. ქვეყნის მასშტაბით, ამომრჩეველთა საერთო რაოდენობა 3 508 294-ს შეადგენს. ამომრჩევლებს, ჯამში, 3 111 საარჩევნო უბანი ემსახურება.

საარჩევნო პროცესს დააკვირდება 76 საერთაშორისო და 111 ადგილობრივი ორგანიზაციის დამკვირვებელი, ჯამში 25 000 - მდე პირი. პროცესს გააშუქებს 199 მედია ორგანიზაციის 2800-ზე მეტი წარმომადგენელი.

26 ოქტომბერს საქართველოში საპარლამენტო არჩევნები ტარდება.