ქუთაისიპოსტი

ქუთაისის მულტიფუნქციური საგამოფენო სივრცის პროექტისთვის, რომლის მშენებლობაც თითქმის დასრულებულია, კიდევ ერთი, ახალი, ტენდერი ცხადდება.

სახელმწიფო შესყიდვა [NAT240020363], ძირითადად, ელექტრომომარაგების, წყლისა და კანალიზაციის სისტემების საინჟინრო სამუშაოებს მოიცავს, რომლის სავარაუდო ღირებულებაც 1 მილიონ 508 045 ლარია. 

სატენდერო დოკუმენტაციის მიხედვით, პროექტი ასევე ითვალისწინებს სახანძრო სიგნალიზაციის სისტემის, ვიდეო სამეთვალყურეო სისტემისა და ინტერნეტ ქსელის მოწყობას. 

წინადადების მიღება 1 ნოემბერს იწყება და 6-ში სრულდება, აღნიშნული სამუშაოები კი ხელშეკრულების დადებიდან 4 თვეში უნდა დასრულდეს. 

ქუთაისში, დავით აღმაშენებლის მოედანზე, მუზეუმის ნაცვლად, მულტიფუნქციური საგამოფენო სივრცის კონსტრუქციული და არქიტექტურული ნაწილის მშენებლობა დასრულების ფაზაშია და ამ ეტაპზე, სახურავისა და ვიტრაჟების მონტაჟი მიმდინარეობს.

ობიექტის რეაბილიტაციისთვის გამოცხადებული ტენდერის მიხედვით, რომლის ღირებულებაც 5 მილიონ 064 103 ლარია, სამუშაოები წლის ბოლოს (2024 წლის 31 ჩათვლით) უნდა დასრულდეს. 







ასე გამოიყურება ახლა ქუთაისის ახალი საგამოფენო სივრცე

მულტიფუნქციური საგამოფენო სივრცის მოსაწყობად ტენდერი გასულ წელს გამოცხადდა. მაშინდელი სახელშეკრულებლო დოკუმენტაციის მიხედვით, სამუშაოები 2023 წლის 15 თებერვლის ჩათვლით უნდა დასრულებულიყო. ამ დრომდე გაჭიანურების მიზეზი პროექტში შესული ცვლილებებია, რაც ობიექტის მდგრადობის თავიდანვე არ შესწავლით, შემდეგ კი საგამოფენო სივრცისთვის გამოსაყენებელი მუზეუმის შენობის სამივე ფასადის დაშლით არის გამოწვეული.

იმის გამო, რომ შენობის მდგრადობაზე ექსპერტიზის ჩატარება, მერიაში, გვიან, სარეაბილიტაციო სამუშაოების შუა პროცესში, პროტესტის შემდეგ მოაფიქრდათ, შპს „ნს-სტუდიას“ როგორც კონსტრუქციულ, ასევე არქიტექტურულ ნაწილში, პროექტის შეცვლა მოუწია.

დაშალეს მუზეუმის ყოფილი შენობის სამივე კედელი, რომელთა გამოყენებითაც (თავდაპირველი პროექტით) უნდა აშენებულიყო მულტიფუნქციური საგამოფენო სივრცე. ამიტომ, სამშენებლო კომპანია „ართვინ ჯორჯიას“ ახალი კედლების აშენება მოუწია, რომელშიც მუზეუმის შენობის დაშლილი ფასადების შემონახული დეტალები და ორნამენტები გამოიყენა.

როგორი უნდა ყოფილიყო ქალაქის ცენტრში მულტიფუნქციური სივრცე ნახეთ აქ.

ქუთაისში, მუზეუმის ყოფილ შენობაში საგამოფენო სივრცის მოწყობითი სამუშაოები გასული წლის ზაფხულში დაიწყო. ახალი სივრცის პროექტი შპს "ნს სტუდიომ" მოამზადა, რომლის მიხედვითაც შენობას ძველი იერსახე შეუნარჩუნდება და ახალ არქიტექტურასთან სინთეზი მოხდება. მოეწყობა ტერასა მთავარი მოედნის ხედით და ამფითეატრის ტიპის სცენა 100 მაყურებლისთვის, გამომდინარე სივრცითი, კომპოზიციური და ფუნქციური მახასიათებლებიდან. შენობა გათვალისწინებული იქნება, როგორც მრავალფუნქციური საზოგადოებრივი ცენტრი, საგამოფენო დარბაზებითა და სახელოვნებო მიმართულებების სივრცეებით.

ეთნოგრაფიული მუზეუმის ყოფილი შენობა 1860 წელს აშენდა. 2013 წლამდე აქ მუზეუმი ფუნქციონირებდა. 2012 წლის 9 იანვარს, საქართველოს კულტურისა და ძეგლთა დაცვის მაშინდელი მინისტრის ბრძანებით, ობიექტს კულტურული მემკვიდრეობის უძრავი ძეგლის სტატუსი მოეხსნა. 2017 წელს, ფუნქციის გარეშე დარჩენილ შენობაში ბიზნესმენი თემურ ჭყონია სასტუმროს მშენებლობას გეგმავდა, თუმცა, საბოლოოდ, შეთანხმება არ შედგა.

წლების განმავლობაში მერიამ შენობას ფუნქცია ვერ მოუძებნა. ისტორიულ ნაგებობას ერთადერთი დატვირთვა ჰქონდა - ადგილობრივი ხელისუფლება მის ფასადს ქალაქში განხორციელებული ინფრასტრუქტურული პროექტების ამსახველი ბანერების გამოსაფენად იყენებდა.

ამავე თემაზე:

კედლები ამოყვანილია - საგამოფენო სივრცე, რომლის მოწყობა დასრულებული უნდა იყოს