ქუთაისიპოსტი

ქუთაისის #16 საარჩევნო უბანზე, კომისიის წევრებს შორის ფუნქციების (გადასატანი ყუთის გამყოლის, ნაკადის მომწესრიგებელის, რეგისტრატორების) გამოსავლენად, წილისყრა ჩატარდა.

წილისყრა ზუსტად 12 საათზე დაიწყო, თუმცა უბანზე, რომელიც 17 წევრისგან შედგება, პარტიების მიერ წარდგენილი 7 კომისიის წევრი (აქედან ერთი საოლქოდან) არ მივიდა.

საუბნო საარჩევნო კომისიის თავმჯდომარის, მაია ცხვედიანის თქმით, წილისყრა მხოლოდ რეგისტრატორების გამოსავლენად ჩატარდა, დანარჩენი ფუნქციების გამოსავლენად კი გადათამაშება არ შემდგარა. 

"არ იმყოფებოდნენ შემდეგი პარტიების: "ევროპული სოციალისტების", "ერთიანობა ნაციონალური მოძრაობის", "ძლიერი საქართველოს", "ევროპული საქართველოს", ალეკო ელისაშვილის პარტიდან დანიშნული კომისიის წევრები და ერთი - ოლქის მიერ დანიშნული. გადასატანი ყუთის გამყოლის ფუნქციაზე გათამაშება არ ჩატარდა, რადგან მხოლოდ ორი იყო პარტიის წარმომადგენელი და აქედან, ერთ-ერთმა უარი განაცხადა",- განმარტა მაია ცხვედიანმა.

მისივე თქმით, პირველ გადასატან ყუთს გაყვებიან "ოცნებიდან" და ელისაშვილის პარტიიდან კომისიის წევრები, მეორე გადასატან ყუთს კი "ნაციონალური მოძრაობის" მიერ დანიშნული კომისიის წევრი, რომელსაც წაყვება ორი სპეცწევრი. 

მისივე თქმით, ნაკადის მომწესრიგებლის ფუნქცია "ევროპული სოციალისტების" წევრს მიანიჭეს, რეგისტრატორების კი - ოლქის მიერ დანიშნულ წევრებს. 

ქუთაისის #16 საარჩევნო უბანზე სულ 2465 ამომრჩეველია რეგისტრირებული, გადასატან ყუთში კი - 47. დღეის მონაცემებით კი, ქუთაისში, ჯამში, 152 506 ამომრჩეველია დარეგისტრირებული.

ეს პირველი არჩევნებია, როდესაც კომისიის წევრებს შორის ფუნქციების გამოსავლენად წილისყრა არა უშუალოდ არჩევნების დღეს, არამედ, არჩევნებამდე ერთი კვირით ადრე ჩატარდა.

26 ოქტომბერს, საქართველოში, საპარლამენტო არჩევნები გაიმართება.