ქუთაისიპოსტი

სახელმწიფოს შუამავლობით, შუქრუთელებსა და კომპანია "ჯორჯიან მანგანეზს" შორის მედიაციის მიუხედავად, საქართველოს პარლამენტთან პროტესტი არ შეწყვეტილა.

"ჩვენი და მათი პოზიციები აბსოლუტურად განსხვავებულია. კომპანიაც და სახელმწიფოც სხვა რეალობიდან გვესაუბრება. არ იყო არანაირი კონკრეტიკა. გვრჩება განცდა, რომ დროის გაწელვას ცდილობენ, რომ როგორმე არჩევნებამდე მივიდნენ", - ამბობს აქციის ერთ-ერთი მონაწილე, გიორგი ნეფარიძე.

ჭიათურის სოფელ შუქრუთის მცხოვრებლები შვიდი თვეა საპროტესტო აქციებს მართავენ. 11 სექტემბერს მათ თბილისში, საკანონმდებლო ორგანოსთან გადაინაცვლეს, სადაც უწყვეტ პროტესტს მართავენ. აქციის მონაწილეებს უმძიმე პირობებში უწევთ ღამის გათენება. პოლიცია მათ კარვების გაშლის უფლებას არ აძლევს. შუქრუთელებს პირიც ჰქონდათ ამოკერილი და 43 დღის განმავლობაში შიმშილობდნენ. აქციის მონაწილეებმა პროტესტის უკიდურეს ფორმაზე უარი მხოლოდ მას შემდეგ თქვეს, რაც მათთან პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე რატი იონათამიშვილი მივიდა და "ჯორჯიან მანგანეზთან" მედიაცია შესთავაზა.

შპს "ჯორჯიან მანგანეზი" ჭიათურა-საჩხერის მუნიციპალიტეტში მანგანუმის მადნის სამთო მოპოვების ლიცენზიის მესაკუთრეა. კომპანია ჭიათურის მთლიან ტერიტორიაზე (16 430 ჰექტარზე) ოპერირებს. მადნის მოპოვებას დამანგრეველი შედეგები აქვს სოფელ შუქრუთისა და ითხვისისთვის. სოფლებში, საცხოვრებელი სახლების ნაწილი დაბზარულია, ნაწილი კი მიწამ ჩაიტანა. ადგილობრივები კომპანიისგან სამართლიან კომპენსაციას ითხოვენ, რათა ალტერნატიული საცხოვრებელი ფართები შეიძინონ და უსაფრთხო გარემოში ცხოვრება შეძლონ. "ჯორჯიან მანგანეზი" აცხადებს, რომ მან დაზარალებულებზე უკვე გასცა თანხა, თუმცა, შუქრუთელები ამბობენ, რომ მათ უმრავლესობას კომპენსაცია არ მიუღია.