ქუთაისიპოსტი

"ხუთი წელია ვითხოვთ, რომ კომპენსაცია იყოს სამართლიანი. აქ არ არის საუბარი მხოლოდ მიწის ნაკვეთზე და საცხოვრებელ სახლზე. ჩვენ ფსიქო-ემოციური, მორალური ზიანი გვადგება იმის გამო, რომ იძულებულები ვართ დავტოვოთ ჩვენი საარსებო გარემო. ამიტომ, კომპანიამ უნდა უზრუნველყოს სამართლიანი კომპენსაციების გაცემა. თუ მედიაციის პროცესში დავინახავთ, რომ ეს ასე არ ხდება, აღარ იქნება კვლავ 40 დღიანი შიმშილობა, ამოვიკერავთ პირს და დავიწყებთ მშრალ შიმშილობას. შემდეგ ყველა ნახავს რაც მოხდება. ჩვენ, ჩვენი საარსებო გარემო გვიღირს სიცოცხლის ფასადაც", - ამბობს გიორგი ნეფარიძე.

ჭიათურის სოფელ შუქრუთის მცხოვრებლები შვიდი თვეა საპროტესტო აქციებს მართავენ. 11 სექტემბერს მათ თბილისში, საკანონმდებლო ორგანოსთან გადაინაცვლეს, სადაც უწყვეტ პროტესტს მართავენ. აქციის მონაწილეებს უმძიმე პირობებში უწევთ ღამის გათენება. პოლიცია მათ კარვების გაშლის უფლებას არ აძლევს.  შუქრუთელებს პირიც ჰქონდათ ამოკერილი და 43 დღის განმავლობაში შიმშილობდნენ. აქციის მონაწილეებმა პროტესტის უკიდურეს ფორმაზე უარი მხოლოდ მას შემდეგ თქვეს, რაც მათთან პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე რატი იონათამიშვილი მივიდა და "ჯორჯიან მანგანეზთან" მედიაცია შესთავაზა.

სოფელ შუქრუთის მცხოვრებლები, კომპენსაციის მიღების მოთხოვნით, ქუჩაში 3 წლის წინაც გამოვიდნენ. მაშინაც მათ პროტესტის უკიდურეს ფორმას მიმართეს და პირი ამოიკერეს. 220 დღიანი აქციების შემდეგ შეთანხმება შედგა და კომპანიამ მოთხოვნილი კომპენსაციების გაცემის პირობა დადო, თუმცა, სოფელ შუქრუთის მცხოვრებლები ამბობენ, რომ მათ უმრავლესობას ზიანის ფინანსური ანაზღაურება ამ დრომდე არ მიუღიათ.

შპს "ჯორჯიან მანგანეზი" ჭიათურა-საჩხერის მუნიციპალიტეტში მანგანუმის მადნის სამთო მოპოვების ლიცენზიის მესაკუთრეა. ის მოპოვებით სამუშაოებს ჭიათურის მთლიან ტერიტორიაზე (16 430 ჰექტარზე) ახორციელებს.