ქუთაისიპოსტი

შუქრუთელების უწყვეტი აქციის 7 თვის თავზე და შიმშილობის 43-ე დღეს, პროცესებში, სახელმწიფოს წარმომადგენელი ჩაერთო.

პარლამენტთან “ქართული ოცნების” დეპუტატი, რატი იონათამიშვილი, მივიდა და პროტესტის მონაწილეებს "ჯორჯიან მანგანეზთან" მოდერატორობა შესთავაზა, რის შემდგომაც შეხვედრა კომპანიის, მოშიმშილეებისა და სახელმწიფოს წარმომადგენლების მონაწილეობით შედგა. 

აღსანიშნავია, რომ რატი იონათამიშვილი "ქართული ოცნების" საპარლამენტო არჩევნების სიაში 62-ე ნომერია. 

როგორც შუქრუთის მკვიდრი გიორგი ნეფარიძე განმარტავს, მოპალარაკებების დაწყებისა და გართულებული ჯანმრთელობის მდგომარეობის ფონზე, შუქრუთელებმა შიმშილობის შეწყვეტის გადაწყვეტილება მიიღეს, თუმცა, უწყვეტი პროტესტი პარლამენტთან და სოფელ შუქრუთში კვლავ გრძელდება.

"მოხდა უკვე შეხვედრა კომპანიას, სახელმწიფოს წარმომადგენელსა და ჩვენ, დაზარალებულ მოსახლეობას, შორის. შევთანხმდით სამმხრივ კომისიაზე, რომელი კომისიაც საბოლოოდ მივა სამართლიან ხელშეკრულებამდე. შიმშილობა შეწყდება, გადავლენ ეს ადამიანები კლინიკაში, სადაც გაივლიან რეაბილიტაციის კურს. პროტესტი კი უწყვეტ, 24 საათიან რეჟიმში, კვლავ გაგრძელდება, მანამ, სანამ დოკუმენტურად არ გვექნება გარანტია იმისა, რომ ჩვენი მოთხოვნები შესრულდება", -  განმარტავს გიორგი ნეფარიძე. 

მისივე თქმით, მიიღეს იმის გარანტიაც, რომ სანამ მოლაპარაკება არ დასრულდება, კომპანია “ჯორჯიან მანგანეზი” სამუშაო პროცესს სოფელ შუქრუთის ტერიტორიაზე არ გააგრძელებს.

ამავდროულად, მედიაციის პროცესში სხვადასხვა სახელმწიფო უწყება, მათ შორის, შრომის, ჯანდაცვის და სოციალური საკითხების სამინისტრო ჩაერთვება.

გიორგი ნეფარიძის თქმით, შემდეგი შეხვედრა სამშაბათს, 15 ოქტომბერს შედგება, რის შემდეგაც შეთანხმების დამატებითი დეტალები გაირკვევა.

"ამ შეხვედრის შემდეგ უფრო დეტალურად გვეცოდინება ყველაფერი. ჯერ ახლა დაიძრა პროცესები და იმედია, მალე მივალთ ლოგიკურ და სამართლიან დასასრულამდე", -  აღნიშნავს ნეფარიძე. 



შუქრუთელები 212 დღეზე მეტია, უწყვეტი პროტესტის რეჟიმში იმყოფებიან და კომპანია “ჯორჯიან მანგანეზისგან” მათთვის მიყენებული ზიანის სამართლიან ანაზღაურებას ითხოვენ. ისინი, ამ ხნის განმავლობაში, ცენტრალურ ხელისუფლებას პროცესებში ჩართულობას სთხოვდნენ, რათა  „ჯორჯიან მანგანეზს” მათთან აღებული ვალდებულებები შეესრულებინა. 

სოფელ შუქრუთის მცხოვრებლები, კომპენსაციის მიღების მოთხოვნით, ქუჩაში, 3 წლის წინაც გამოვიდნენ. მაშინ მათ პროტესტის უკიდურეს ფორმას მიმართეს და პირიც ამოიკერეს.

მოსახლეობასა და კომპანია „ჯორჯიან მანგანეზს“ შორის შეთანხმება 220 დღიანი პროტესტის შემდეგ შედგა.

"ჯორჯიან მანგანეზმა" 2021 წლის 16 მაისს განაცხადა, რომ საინჟინრო კვლევების საფუძველზე, სოფელში, 36 ოჯახი ჯამში 2 300 000 ლარის კომპენსაციას მიიღებდა.

შპს "ჯორჯიან მანგანეზი" ჭიათურა-საჩხერის მუნიციპალიტეტში მანგანუმის მადნის სამთო მოპოვების ლიცენზიის მესაკუთრეა. ის მოპოვებით საქმიანობას ჭიათურის მთლიან ტერიტორიაზე (16 430 ჰექტარზე) ახდენს.

ფოტოები: მარიამ ნიკურაძე