ქუთაისიპოსტი

"ქართული ოცნების" მიერ ინიცირებული "ამნისტიის შესახებ" კანონპროექტი ქუთაისში გააპროტესტეს.

პატიმრების ოჯახის წევრები და ახლობლები მესხიშვილის თეატრის წინ შეიკრიბნენ, სადაც ბანერები, წარწერით: "ამნისტია პატიმრებს", "პატიმარი ადამიანია" მიიტანეს. 

მათი მთავარი მოთხოვნაა, გაფართოვდეს მუხლები, რომლებსაც ამნისტია მოიცავს. 

"ჩვენი მოთხოვნაა, 1/4 ყველა პატიმარს. არ ვითხოვთ იმას, რომ ყველა პატიმარი გაათავისუფლონ და ციხის კარები გაიღოს, უბრალოდ ვითხოვთ ჰუმანური აქტის გამოცემას და 1/4-ს ყველა პატიმარზე. ბევრი წინაპირობა და დათქმა აქვს და ფაქტობრივად, ვერავინ ვერ გამოდის ამ ამნისტიით და ამ კანონპროექტით", - განმარტა აქციის ერთ-ერთმა მონაწილემ.

ანალოგიური მოთხოვნით, "ამნისტიის შესახებ" კანონპროექტთან დაკავშირებით, აქცია დღეს თბილისშიც გაიმართა.

პარლამენტის იურიდიულმა კომიტეტმა ფრაქცია „ქართულმა ოცნების“ კანონპროექტს „ამნისტიის შესახებ“ პირველი მოსმენით მხარი დაუჭირა.  მას დღეს, 19 ივლისს, პარლამენტის რიგგარეშე სესიის სხდომაზე პირველი მოსმენით უყრიან კენჭს.

პროექტის მიხედვით, ამნისტია 2024 წლის 1-ელ ივლისამდე ჩადენილ რიგ დანაშაულებზე გავრცელდება. კერძოდ, “სისხლის სამართლის კოდექსის“ 66 მუხლით გათვალისწინებულ დანაშაულებში მსჯავრდებული პირები სასჯელისგან სრულად გათავისუფლდებიან ან სასჯელი 1/2-ით ან 1/4-ით შეუმცირდებათ. გარდა ამისა, სასჯელის 1/6-ით შემცირება “სისხლის სამართლის კოდექსის“ 225 მუხლს შეეხება.

ამნისტია არ შეეხება: - მკვლელობისთვის ნასამართლებ პირებს, ნარკორეალიზატორებს, სქესობრივ დანაშაულებს, ყაჩაღობას, ტერორიზმს, კორუფციულ და სამოხელეო დანაშაულს, ქურდულ სამყაროს, კონვენციურ დანაშაულებს, ტრეფიკინგს და სხვა მძიმე და განსაკუთრებით მძიმე კატეგორიის დანაშაულებს.

ამასთან, “ქართული ოცნების“ ინფორმაციით, დაახლოებით 7 000 პირს პირობითი მსჯავრის ერთი წლით შემცირება შეეხება.

“ამნისტიის შესახებ“ პროექტს პარლამენტი რიგგარეშე სხდომაზე პირველი მოსმენით მიიღებს. მეორე-მესამე მოსმენით განხილვა საშემოდგომო სესიის ფარგლებში გაგრძელდება.