ქუთაისიპოსტი

სახელმწიფო ქონების ეროვნულმა სააგენტომ  ელექტრონულ აუქციონზე გასაყიდად წყალტუბოში მდებარე კიდევ ორი სანატორიუმი გამოიტანა.

საუბარია ყოფილ სანატორიუმ „რკინიგზელსა“ და „იმერეთზე“, რომელსაც საინვესტიციო პროექტის „წყალტუბოს ახალი სიცოცხლის“ ფარგლებში ყიდის.

ქალაქ წყალტუბოში მდებარე ყოფილი სანატორიუმი „რკინიგზელი“ აუქციონზე 5 135 000 ლარად იყიდება. საპრივატიზებო პირობების მიხედვით, ტერიტორიაზე სულ მცირე 120 ნომრიანი სასტუმრო-კომპლექსი უნდა მოეწყოს, რისთვისაც არანაკლებ 9 273 600 ლარის ინვესტიცია განხორციელდება.

სანატორიუმი „იმერეთი“ კი აუქციონზე 3 124 500 ლარად იყიდება. საინვესტიციო პირობები აქაც იგივეა. ტერიტორიაზე სულ მცირე 120 ნომრიანი სასტუმრო-კომპლექსი უნდა მოეწყოს, რისთვისაც არანაკლებ 9 273 600 ლარის ინვესტიცია განხორციელდება.

"წყალტუბოს ახალი სიცოცხლე" პროექტის ფარგლებში, სახელმწიფომ გასაყიდად 14 ობიექტი 2022 წლის 5 ივლისს გამოიტანა, რომელთა ჯამური ღირებულება, დაახლოებით, 50 მლნ ლარია.

პროექტის თანახმად, სახელმწიფო ათეულობით მილიონი ლარის ინვესტირების ვალდებულებას იღებს, რათა წყალტუბოს საერთაშორისო დონის სპა-კურორტად იქცეს.

როგორც სააგენტოში აცხადებენ, წყალტუბოს აღდგენისა და განვითარების მასშტაბური პროექტის განხორციელება შექმნის 3 200-ზე მეტ ახალ სამუშაო ადგილს, საწოლფონდს 6 000-ზე მეტი ადგილით, მოიზიდავს 500 მლნ ლარის ოდენობის ინვესტიციას და მნიშვნელოვნად გაზრდის ვიზიტორების რაოდენობას.

დღეის მდგომარეობით, უკვე პრივატიზებულია ყოფილი სანატორიუმები „თბილისი“, „მედეა“ და „წყალტუბო“, რომელთა რეალიზებით სახელმწიფომ ჯამურად 11 582 300 ლარი მიიღო.