ქუთაისიპოსტი

9 ივნისს მოსულმა სტიქიამ იმერეთის მუნიციპალიტეტების მოსახლეობა დააზარალა.
განსაკუთრებით რთული ვითარებაა ბაღდათსა და ზესტაფონში, სადაც ძლიერმა სეტყვამ, წვიმამ და ქარმა პრობლემები შექმნა.

ადგილობრივების თქმით, დაზიანდა სახნავ-სათესი სავარგულები და საცხოვრებელი სახლები.

„დაიწყო ჯერ წვიმა, მერე მოაყოლა სეტყვა დიდი რაოდენობით, მუჭის სიმსხოები იყო. სულ რაღაც 10 წუთში განმეორდა და გაგრძელდა 25 წუთი. ყველაფერი გააფუჭა, ხილი, თხილი, ვენახი, ყანა, არაფერი დაგვიტოვა, ატირებულია მთელი სოფელი“,- ამბობს ზესტაფონის სოფელ მეორე სვირის მცხოვრები.

იმერეთის მუნიციპალიტეტებში მოსული სტიქიის ზარალი ჯერ ცნობილი არ არის. ადგილობრივ თვითმმართველობებს სტიქიის შესახებ  ოფიციალურად ჯერ არანაირი ინფორმაცია არ გაუვრცელებიათ. 

საგანგებო სიტუაციების მართვის სამსახურში კი გვითხრეს, რომ დაშავებულების შესახებ ინფორმაცია შემოსული არ არის.

გარემოს ეროვნული სააგენტოს ინფორმაციით, საქართველოს უმეტეს რაიონში წვიმა (ზოგან ძლიერი), ელჭექი, სეტყვა და ქარის გაძლიერება 10 ივნისის ჩათვლით გაგრძელდება. 

ფოტო: ტვ პირველი