ქუთაისიპოსტი

არა რუსულ კანონს! კი ევროპას! - ამ ლოზუნგით, ქუთაისში კიდევ ერთი საპროტესტო აქცია გაიმართება. 

პროტესტის 23-ე დღეს, რუსული კანონის მოწინააღმდეგები, 17:00 საათზე, თეთრ ხიდთან შეკრიბებიან და აქცია-პერფორმანს მოაწყობენ.

ამ გზით ქუთაისელი ახალგაზრდები, სამოქალაქო სექტორის, არასამთავრობო ორგანიზაციებისა და მედიის წარმომადგენლები ხელისუფლებას კიდევ ერთხელ ეტყვიან, რომ ამ კანონის მიღების წინააღმდეგები არიან.

აქცია-პერფორმანსის შემდეგ, ადგილზე შეკრებილები, 18:00 საათიდან, საფიჩხიის უბნისკენ მსვლელობას მოაწყობენ. 

"მსვლელობები გაგრძელდება ყოველდღე და მოიცავს მთელ ქალაქს, სანამ ხელისუფლება არ გაიგონებს ქართველი ხალხის ხმას და არ გაიწვევს რუსულ კანონს. გელოდებით ყველას, ვინც საქართველოს ევროპულ მომავალს უჭერთ მხარს",- განმარტავენ რუსული კანონის მოწინააღმდეგეები. 

„ქართულმა ოცნებამ“ რუსული კანონი, პირველი მოსმენით 17 აპრილს, მეორე მოსმენით კი პირველ მაისს მიიღო. მას მხარი 83-მმა დეპუტატმა დაუჭირა.

„უცხოური გავლენის გამჭვირვალობის შესახებ“ კანონპროექტი, რომელიც ფრაქცია "ქართული ოცნების" სახელით არის რეგისტრირებული, შინაარსით გასულ წელს ინიცირებული და საპროტესტო აქციების შედეგად გაწვეული პროექტის ანალოგიურია.

კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ „უცხოური ძალის ინტერესების გამტარებლის“ სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.