ქუთაისიპოსტი

„ქუთაისქალაქობა 2024-ის’’ ფარგლებში დაგეგმილი ღონისძიების გამო, განსაზღვრულ ადგილებში, სატრანსპორტო საშუალებათა მოძრაობა დროებით შეიზღუდება.
კერძოდ, ქუთაისის მერიის ინფორმაციით, სასცენო კონსტრუქციის მონტაჟისა და დემონტაჟისთვის, მოძრაობა და პარკირება სრულად შეიზღუდება აღმაშენებლის ქუჩის N5-იდან 100 საფეხურიანი კიბის მიმდებარე ტერიტორიამდე (გზის სავალი ნაწილის ორივე ზოლი).

ამასთან, 2 მაისს, 10:00 საათიდან 18:00 საათამდე, საბავშვო გასართობი ატრაქციონების განთავსებისთვის, მოძრაობა და პარკირება სრულად შეიზღუდება სადგურის ქუჩა N15-იდან სპორტულ მოედნამდე; ხოლო 17:00 საათიდან 21:00 საათამდე, ვინტაჟური ავტომობილების გამოფენის მოწყობისთვის, პარკირება ნაწილობრივ შეიზღუდება დავით აღმაშენებლის ძეგლის მიმდებარედ.

შეზღუდვები 1 მაისის 18:00 საათიდან 3 მაისის 03:00 საათამდე იმოქმედებს.

2 მაისს, ქუთაისში, გვირილობის აღსანიშნავად, სხავდასხვა ღონისძიებები გაიმართება.

ქალაქის მერიამ დაგეგმილი აქტივობების ჩამონათვალი უკვე გამოაქვეყნა.

''გვირილობა 2024'' ტრადიციული ღონისძიებებით აღინიშნება, თუმცა აქტივობების უმეტესი ნაწილი, განსხვავებით წინა წლებისგან, არა ქალაქის ცენტრალურ მოედანზე, არამედ ასსაფეხურიან კიბესთან გაიმართება.

გვირილობის აღნიშვნა ბაგრატის ტაძარში ქუთაისის დალოცვით დაიწყება და სამი ოთარის ძეგლის პატივგებით გაგრძელდება. დაგეგმილია ასევე ჯომარდობა მდინარე რიონზე.

ამას გარდა, დღის მანძილზე ასსაფეხურიან კიბესთან მოეწყობა გამოფენები.

საღამოს, 18:00 საათზე, მესხიშვილის სახელმწიფო თეატრში, საოპერო მუსიკის კონცერტი გაიმართება, სადაც სოლისტები ნინო სურგულაძე, სერხიო ესკობარ პერესი და მარიკა მაჩიტაძე იმღერებენ. ღონისძიების დასასრულს კი ასსაფეხურიანი კიბის მიმდებარედ გალა-კონცერტია დაგეგმილი. 

ქუთაისში "გვირილობის" დღესასწაულის აღნიშნვა 1911 წლიდან დამკვიდრდა. გვირილას, როგორც ბუნებრივ ანტიბიოტიკს, ტუბერკულოზთან ბრძოლაში სიმბოლური დატვირთვა ჰქონდა. გაზაფხულის ამ დღეს გაყიდული ყვავილებიდან მიღებული შემოსავალი დაავადებულთა მკურნალობას ხმარდებოდა.