ქუთაისიპოსტი

ჭიათურის მუნიციპალიტეტის სოფელ შუქრუთში მოსახლეობის პროტესტი მეორე დღეა, გრძელდება.
ადგილობრივებმა შუქრუთის მაღაროსთან დღეს კარავი გაშალეს.

მათი თქმით, "ჯორჯიან მანგანეზის" მიერ მადნის მოპოვების სამუშაოების გამო მათი საცხოვრებელი სახლები, ეზოები და სახნავ-სათესი მიწები დაზიანებდა, კომპანიისგან კი, დაპირების მიუხედავად, ზარალის შესაბამისი კომპენსაცია არ მიუღიათ.

აქციის მონაწილეები შუქრუთის მაღაროს მუშაობის საშუალებას არ აძლევენ და აცხადებენ, რომ აქცია მანამ გაგრძელდება, ვიდრე მათი მოთხოვნები არ დაკმაყოფილდება.

"ჯორჯიან მანგანეზში" კი განმარტავენ, რომ 2020 წლიდან სოფელ შუქრუთსა და პერევისაში, ჯამში, დაახლოებით 11 მილიონი ლარი გაიცა.

"დღეს, ჭიათურის მუნიციპალიტეტის სოფელ შუქრუთში, რადიკალურმა ჯგუფმა თვითნებურად, კანონდარღვევით შეაფერხა სამუშაო პროცესი. გადაკეტილია კოროხნალის მაღაროს შესასვლელი. შუქრუთის მაღაროზე გათიშულია ცენტრალური განიავების სისტემა, რამაც საფრთხე შეუქმნა დასაქმებულთა ჯანმრთელობას. აღნიშნული ქმედება შეიცავს სისხლის სამართლის დანაშაულის ნიშნებს, რაც ისჯება კანონით. რადიკალურად განწყობილ ჯგუფს, რომელიც კომპანიას მოთხოვნებს უყენებს, კომპენსაცია უკვე აღებული აქვს. თანხები კერძო საკუთრების ინდივიდუალური შეფასების მიხედვით, სხვადასხვა წლებში ეტაპობრივად გაიცა. პროცესში ჩართული ადგილობრივები კი ცდილობენ საზოგადოება შეცდომაში შეიყვანონ და წარმოაჩინონ, რომ კომპანიისგან კომპენსაციები არ მიუღიათ.

მაღალი საზოგადოებრივი ინტერესიდან გამომდინარე, კომპანია ასაჯაროებს გაცემული თანხების ოდენობას. 2020-წლიდან სოფელ შუქრუთსა და პერევისაში ჯამში დაახლოებით 11 მილიონი ლარი გაიცა. კომპენსაციებით დაკმაყოფილების პროცესი დროებით გლობალურმა კრიზისმა შეაფერხა. მიმდინარე თვიდან კი თანხების გაცემა კატეგორიების მიხედვით განახლდა.

ჯორჯიან მანგანეზი მოუწოდებს პროცესის მონაწილეებს არ შეაფერხონ, როგორც კომპანიის ოპერირება, ასევე კომპენსაციების გაცემის პროცესი",- აღნიშნულია კომპანიის განცხადებაში. 

სოფელ შუქრუთის მცხოვრებლები, კომპენსაციის მიღების მოთხოვნით, ქუჩაში, 3 წლის წინაც გამოვიდნენ. მაშინ მათ პროტესტის უკიდურეს ფორმას მიმართეს და პირიც ამოიკერეს.

მოსახლეობასა და კომპანია „ჯორჯიან მანგანეზს“ შორის შეთანხმება 220 დღიანი პროტესტის შემდეგ შედგა.

"ჯორჯიან მანგანეზმა" 2021 წლის 16 მაისს განაცხადა, რომ საინჟინრო კვლევების საფუძველზე, სოფელში, 36 ოჯახი ჯამში 2 300 000 ლარის კომპენსაციას მიიღებდა.

შპს "ჯორჯიან მანგანეზი" ჭიათურა-საჩხერის მუნიციპალიტეტში მანგანუმის მადნის სამთო მოპოვების ლიცენზიის მესაკუთრეა. ის მოპოვებით საქმიანობას ჭიათურის მთლიან ტერიტორიაზე (16 430 ჰექტარზე) ახდენს.

ფოტო: მარიამ ნიკურაძე