ქუთაისიპოსტი

ბაღდათში, ქალაქის ცენტრში, წერეთლის ქუჩაზე მდებარე კორპუსში მცხოვრებლებმა აქცია გამართეს.
ადგილობრივებმა ხუთსართულიანი საცხოვრებელი კორპუსის ხარვეზებით რეაბილიტაცია გააპროტესტეს, რის გამოც, მათი თქმით, ავარიულ და სიცოცხლისთვის საშიშ გარემოში უწევთ ცხოვრება. 

მათივე განმარტებით, პრობლემები მას შემდეგ დაიწყო, რაც კორპუსს რეაბილიტაცია, ორი წლის წინ, პროექტ „განახლებული რეგიონების" ფარგლებში ჩაუტარდა.

აქციის მონაწილეების თქმით, შეიცვალა სახურავი და აივნის წინა ფასადი, თუმცა სამუშაოები უხარისხოდ ჩატარდა, რის გამოც ბინაში წყალი ჩადის, ჭერი დაზიანებულია, კედლები ხავსმოკიდებული, იატაკი კი - დეფორმირებული.



„არასწორად გადახურეს, თოვლი ცალ გვერდზე აწვება და შეიძლება სახლიც გადაბრუნდეს. სახლი ავარიულია, ბინაში წყალი ჩამოდის, კედლები აღარ ვარგა. გადახურვა რომ მოხდა, საჰაეროებიც ამოკეტეს. საპირფარეშოში ვერ მოითქვამ სულს, სამზარეულოში ჰაერი არ არის, რა გააკეთეს კაცმა არ იცის, მთავარია ფული იშოვეს. აქამდე ასჯერ უკეთესი ვითარება იყო, ვიდრე ახლაა“,- განმარტავს წერეთლის #18-ის მკვიდრი.

ადგილობრივები ამბობენ, რომ ხელისუფლებას არაერთხელ მიმართეს, თუმცა უშედეგოდ, ამიტომ ცხოვრება შიშში უწევთ.

„უხარისხოდ გააკეთეს, კედლებს მოყვება წყალი წვიმაში, სულ დამპალია. კარგად თუ ვერ აკეთებდნენ, რას მოკიდეს ხელი. გაგვიკეთონ როგორც იყო ისე, ნუ ჩამოგვივა წყალი და ნუ დავზიანდებით, მეტი არაფერი გვინდა. არის წყალი ჩამოსული, არის დაზიანებები და გვეშინია, სახიფათოა, აქ ცხოვრება შეიძლება? დაწერილი გვაქვს საჩივრები, განცხადებები, მაგრამ რეაგირება არაა“- განმარტავს ერთ-ერთი ადგილობრივი.

საკითხთან დაკავშირებით ბაღდათის მუნიციპალიტეტის მერიაში განგვიმარტეს, რომ კომენტარს ვერ გააკეთებ, რადგან სარეაბილიტაციო სამუშაოები არა მათი ბიუჯეტით, არამედ „განახლებული რეგიონების“ პროექტის ფარგლებში ჩატარდა.

წერეთლის 18 ნომერში 40-მდე ოჯახი ცხოვრობს. ისინი პრობლემის დროულად მოგვარებას ითხოვენ, წინააღმდეგ შემთხვევაში კი აქციებს აანონსებენ.