ქუთაისიპოსტი

ქუთაისში, კაფე  "სავანეს’’ მეპატრონეები არ ესწრებიან იმ სასამართლო პროცესს, სადაც უკვე დანგრეული შენობის დემონტაჟს "განიხილავენ".
დღეს ქუთაისის სააპელაციო სასამართლო ,,სავანეს'' დემონტაჟის საკითხზე "მსჯელობს", მაშინ როცა,  ობიექტი მერიამ ერთი თვის წინ, პირველი ინსტანციის სასამართლოს გადაწყვეტილების, საფუძველზე დაანგრია.
,,სავანეს'' დანგრევის გადაწყვეტილება საქალაქო სასამართლოს მოსამართლემ დარინა აბულაძემ მიიღო და 
დაუყოვნებლივი აღსრულების ნებართვა გასცა. 

ძმები ტურაბელიძეები ამბობენ, რომ ქვეყანაში სასამართლო დამოუკიდებელი არ არის, ამიტომ მასში მონაწილეობას არ მიიღებენ.

გიორგი ტურაბელიძის თქმით, მუშაობას ადვოკატები გააგრძელებენ, რათა შემდგომში სტრასბურგის სასამართლოს მიმართონ.

,,საქართველოს სასამართლო აბსოლუტურად გასულია საკონსტიტუციო ნორმებიდან და ის რაც დღეს "სავანესთან" დაკავშირებით ხდება, არის ინდიკატორი იმ პროცესებისა, რაც ამ ქვეყანაში მიმდინარეობს. სასამართლო მთვრალი მურუსიძის ბანი გახდა. ქართული მართლმსაჯულება გასულია კონსტიტუციური ნორმებიდან, რომელიც პირდაპირ ეთერში გვაჩვენეს. ასეთ სასამართლოში ჩვენ მონაწილეობის მიღება არათუ უადგილო იქნება, არამედ დანაშაულებრივიც. შევდივართ რათა პროტესტი დავაფიქსიროთ და გამოვალთ. სამართლებრივ ბრძოლას აზრი არ აქვს, დაწყებული გვაქვს პოლიტიკური ბრძოლა,’’ - აცხადებს  გიორგი ტურაბელიძე.

კაფის დანგრევის გადაწყვეტილება მერიის მიმართვის საფუძველზე პირველი ინსტანციის სასამართლომ მიიღო. მოსამართლე დარინა აბულაძემ დაუყოვნებლივი აღსრულების გადაწყვეტილება გამოიტანა. 

ქუთაისის ცენტრალურ ბაღში, სადაც კაფე მდებარეობდა, სარეკონსტრუქციო სამუშაოები უნდა დაიწყოს.

აღსანიშნავია, რომ ყოფილი კაფის მფლობელები მგფ-ს, რომელმაც ქუთაისის ცენტრალური ბაღის რეკონსტრუქციაზე ტენდერი გამოაცხადა, კორუფციაში ადანაშაულებენ. ძმები ტურაბელიძეები თვლიან, რომ ბაღის რეკონსტრუქციის პროექტი, რომლის ფარგლებშიც მერია ,,სავანეს’’ დანგრევას ითხოვდა, აშკარა კორუფციის ნიშნებს შეიცავს და საქმე უნდა გამოიძიონ.

ქუთაისის მერიასა და ,,სავანეს’’ მფლობელებს შორის ობიექტის დემონტაჟის საკითხზე სასამართლო დავები 13 ოქტომბრიდან მიმდინარეობდა. მერია კაფის დანგრევას და მეპატრონეებისგან 200 ათას ლარამდე საიჯარო დავალიანების გადახდას ითხოვდა. 16 ნოემბერს ქუთაისის საქალაქო სასამართლოს მოსამართლემ დარინა აბულაძემ კვების ობიექტის დანგრევის გადაწყვეტილება მიიღო. რაც შეეხება მეპატრონეებისგან საიჯარო თანხის გადახდას, ამ ნაწილში მერიის მოთხოვნა არ დაკმაყოფილდა.

მანამდე კი, 5 წლით ადრე, ქუთაისის მერიასა და კაფე-ბარ ,,სავანეს’’ მფლობელებს შორის დავა იმ მიწის საკითხზე მიმდინარეობდა, რომელზეც სავანე იდგა. კაფის მფლობელები ამბობდნენ, რომ შენობასთან ერთად მათ მიწაც იყიდეს და ის მათ ეკუთვნოდათ. მერიაში კი აცხადებდნენ, რომ ,,სავანე’’ კულტურული მემკვიდრეობის ტერიტორიაზე მდებარეობდა და კერძო საკუთრება ვერ იქნებოდა. სასამართლო დავების შედეგად, ორივე ინსტანციის სასამართლომ მიწის მესაკუთრედ მერია აღიარა.

ქალაქის ცენტრალურ ბაღში კაფე 23 წლის განმავლობაში მუშაობდა. კვების ობიექტს 2018 წლიდან აღარ უმუშავია. 90–იან წლებში ის ბამბუკის მსუბუქ კონსტრუქციას წარმოადგენდა, სადაც ღია სანაყინე ფუნქციონირებდა. ობიექტს თავდაპირველად ამხანაგობა „მაგნოლია“ ფლობდა. 1995 წელს კი ის შპს „ნიკოლომ“ 8 986 ამერიკულ დოლარად შეისყიდა.