ქუთაისიპოსტი

ქუთაისში, რუსთაველის  გამზირი №120-ში მდებარე სკვერში არსებული საბავშვო ატრაქციონები დამტვრეულია. 

საბავშვო ყველა გასართობი კონსტრუქცია, რომელსაც რეაბილიტაცია, დაახლოებით, ორი წლის წინ ჩაუტარდა, დაზიანებული და საფრთხის შემცველია. 

დამტვრეულია ატრაქციონების კიბის საფეხურები და ხელის მოსაკიდებელი მოაჯირეები, ასევე დასაჯდომი და მისაყრდნობი ადგილები. მათ ადგილას კი ლურსმნებია დატოვებული. 

რუსთაველის ქუჩა №120

"ატრაქციონის კონსტრუქცია ისეა დაზიანებული, აღდგენას არ ექვემდებარება. მხოლოდ ორი საქანელა ფუნქციონირებს, თუმცა არც ისაა უსაფრთხო. ამასთან, ატრაქციონებს ლურსმნები აქვს, რომელსაც ბავშვი შეიძლება გამოედოს და მნიშვნელოვანი დაზიანება მიიღოს. ამიტომ, ეს პერიმეტრი სრულიად მოსაწესიგებელია",- ამბობს ის მცხოვრები. 



დაზიანებული საბავშვო ინფრასტრუქტურის გამო, მშობლებს შვილების სათამაშოდ გაშვების ეშინიათ. ამიტომაც ბავშვები ქალაქის ცენტრალურ ნაწილში მდებარე სხვა გასართობ სივრცეში მიდიან. 

„ამ ზაფხულს ბავშვები არ გამომიშვია აქ სათამაშოდ, რადგან დაზიანებულია ყველაფერი და მეშინია არ გადმოვარდნენ. ხელის მოსაკიდებელი არც ერთ საქანელას არ აქვს, ფეხის ჩასავარდნიცაა. ამიტომ, ქალაქში გავდივარ და იქ გამყავს ბავშვები სათამაშოდ“,- განმარტავს ერთ-ერთი ადგილობრივი. 


ამძვრალი კიბის საფეხურები

მოქალაქეების თქმით, დაზიანებული ინფრასტრუქტურა მერიამ 2022 წელს შეაკეთა, თუმცა უცნობმა პირებმა, სავარაუდოდ, მოზარდებმა ისევ დააზიანეს. ამიტომ ადგილობრივები საბავშვო კონსტრუქციის რეაბილიტაციას, ან ახალი ატრაქციონების განთავსებას ითხოვენ. ამასთან, ამბობენ, რომ სკვერში ვიდეოკამერები აუცილებლად უნდა გათავსდეს, რათა ვანდალიზმის ფაქტები არ განმეორდეს. 

„ერთი-ორი წელია რაც გააკეთეს ეს სკვერი, მაგრამ მოზარდები თავხედობენ და ამტვრევენ. ძალიან გულდასაწყვეტია, როცა გაკეთებულს არ უფრთხილდები. ამიტომ, ან კამერებია საჭირო, ან ერთი ადამიანი, ვინც ყურადღებას მიაქცევს აქაურობას, ისევ რომ არ მოხდეს ვანდალიზმი“,- გვეუბნება ერთ-ერთი ადგილობრივი. 

მთლიანად მოწყვეტილია საქანელას სკამი

დაჟანგული  და გაწყვეტილი რკინის კონსტრუქცია

რუსთაველის გამზირზე მდებარე სკვერი უქიმერიონის ადმინისტრაციულ ერთეულს ეკუთვნის. ოლქის მაჟორიტარის ამირან კოპალეიშვილის თქმით, საკითხზე ინფორმირებულია და ინვენტარი შეიცვლება.

"ინვენტარის შეცვლასთან დაკავშირებით დაწყებულია გარკვეული პროცედურები, თუ როდის და როგორ უნდა მოხდეს განახლება",- განმარტავს კოპალეიშვილი.

რუსთაველის  გამზირი  N120-ში მდებარე საბავშვო ატრაქციონები ერთ-ერთი იყო იმ 11 ობიექტს შორის, რომელთა ინფრასტრუქტურის შესაკეთებლად მერიამ ორი (ჯამში 100 ათას ლარამდე ღირებულების) ტენდერი 2022 წლის ივნისში გამოაცხადა. ატრაქციონები განაახლეს, თუმცა უცნობმა პირებმა ის მალევე დააზიანეს.