ქუთაისიპოსტი

ქუთაისის ცენტრალურ ბულვარში მდებარე კაფის  "სავანეს"  დემონტაჟი დაიწყო.
ადგილზე ცოტა ხნის წინ დაპირისპირება იყო აღსრულების პოლიციის წარმომადგენლებსა და ,,სავანეს" მხარდამჭერებს შორის. აქციის მონაწილეების ნაწილი პოლიციას შენობაში შესვლის უფლებას არ აძლევდა, ნაწილი კი კაფეში იყო ჩაკეტილი. აღსრულების პოლიციამ კაფეში შეჭრა სცადა და მას შემდეგ რაც კარი ვერ გააღო, მინები შეამტვრია და ადგილზე შესვლა ამ ფორმით მოახერხა.

,,მკვდარი ვარ, საშინელება გაუკეთეს ჩემს ოჯახს", - ამბობს  კაფის თანამფლობელი ირმა ტურაბელიძე.



მანამდე კი შეუძლოდ გახდა კაფის ერთ-ერთი მფლობელი ირაკლი ტურაბელიძე და სასწრაფო-სამედიცინო ბრიგადის გამოძახება გახდა საჭირო. 

კაფის დანგრევის გადაწყვეტილება ქუთაისის საქალაქო სასამაართლოს მოსამართლემ დარინა აბულაძემ მიიღო.

ქუთაისის მერიასა და ,,სავანეს’’ მფლობელებს შორის ობიექტის დემონტაჟის საკითხზე სასამართლო დავები 13 ოქტომბრიდან მიმდინარეობდა. მერია კაფის დანგრევას და მეპატრონეებისგან 200 ათას ლარამდე საიჯარო დავალიანების გადახდას ითხოვდა. 16 ნოემბერს ქუთაისის საქალაქო სასამართლოს მოსამართლემ  კვების ობიექტის დემონტაჟის გადაწყვეტილება მიიღო. რაც შეეხება მეპატრონეებისგან საიჯარო თანხის გადახდას, ამ ნაწილში მერიის მოთხოვნა არ დაკმაყოფილდა.

მანამდე კი, 4 წლით ადრე, ქუთაისის მერიასა და კაფე-ბარ ,,სავანეს’’ მფლობელებს შორის დავა იმ მიწის საკითხზე მიმდინარეობდა, რომელზეც სავანე დგას. კაფის მფლობელები ამბობდნენ, რომ შენობასთან ერთად მათ მიწაც იყიდეს და ის მათი საკუთრებაა, მერიაში კი აცხადებდნენ, რომ ,,სავანე’’ კულტურული მემკვიდრეობის ტერიტორიაზეა აშენებული და ის სკვერს წარმოადგენს, სკვერი კი კერძო საკუთრება ვერ იქნება. სასამართლო დავების შედეგად, ორივე ინსტანციის სასამართლომ მიწის მესაკუთრედ მერია აღიარა.

ქალაქის ცენტრალურ ბაღში კაფე 23 წლის განმავლობაში მუშაობდა. კვების ობიექტს 2018 წლიდან აღარ უმუშავია. 90–იან წლებში ის ბამბუკის მსუბუქ კონსტრუქციას წარმოადგენდა, სადაც ღია სანაყინე ფუნქციონირებდა. ობიექტს თავდაპირველად ამხანაგობა „მაგნოლია“ ფლობდა. 1995 წელს კი ის შპს „ნიკოლომ“ 8 986 ამერიკულ დოლარად შეისყიდა.