ქუთაისიპოსტი

ქუთაისის 2024 წლის ბიუჯეტის პროექტს ოპოზიციამ   მხარი არ დაუჭირა.
"ნაციონალური მოძრაობის“ წევრები პროექტის განხილვას დაესწრნენ, თუმცა კენჭისყრაში მონაწილეობა არ მიიღეს.

პარტიის წევრის გიგა შუშანიას თქმით, ეს ბიუჯეტი მერისა და სხვა ჩინოვნიკების ხელფასების გაზრდაზე, ასევე, ადმინისტრაციული რესურსისა და პოლიტიკური აქტივისტების შენახვაზეა ორიენტირებული, ამიტომ ოპოზიცისგან მხარდაჭერა არ ექნება.

„ამ ბიუჯეტიის შედეგად, ქუთაისი ისევ დარჩება გადათხრილი ქუჩების ქალაქად, ისევ იქნებიან გაჭირვებული ადამიანები, რომლებიც გაიქცევიან ამ ქალაქიდან. ამიტომ, ეს ბიუჯეტი არ იქნება მხარდაჭერილი, რადგან არ არის გათვალისწინებული ჩვენი მოთხოვნები უფასო კვების თანხის გაზრდასთან დაკავშირებით, ასევე, პირველკლასელთათვის უფასო კვების შემოღება, სპილოტედ, ქუთაისის სკოლებში და ა.შ“,- განმარტა გიგა შუშანიამ.

ქალაქის მთავარი საფინანსო პროექტის განხილვამდე სხდომათა დარბაზი დატოვეს „ნაციონალური მოძრაობის“ ყოფილმა და ფრაქციის მოქმედმა წევრებმაც. ფრაქციის თავმჯდომარის გიორგი კილაძის თქმით, აღნიშნული ბიუჯეტის პროექტი 2024 წლის არჩევნებზეა გათვლილი და პარტიული.

„მომავალი წლის ბიუჯეტში 49,8% შრომის ანაზღაურებაზეა მიმართული. გარდა ამისა, 2024 წლიდან ორ ახალ ააიპს ქმნის მერია, რომელზეც თანამშრომლების აყვანა მოუწევს, რაც დამატებითი ხარჯი იქნება. ამასთან, როდესაც ქალაქში მძიმე სოციალურ-ეკონომიკური მდგომარეობაა, მერი კიდევ იზრდის მის შრომის ანაზღაურებას, რაც უბრალოდ, სირცხვილია. ამიტომ, მე ვერ ვხედავ ვერანაირ აზრს, მონაწილეობა მივიღო ამ პარტიული ბიუჯეტის განხილვაში, ეს ქუთაისის ბიუჯეტი არ არის“, -  განმარტა გიორგი კილაძემ.

აღსანიშნავია, რომ ბიუჯეტის დამტკიცებას არ ესწრებოდნენ ოპოზიციონერი დეპუტატები პარტია "საქართველოსთვის" წევრი ელეონორა არჩაია  და "სტრატეგია აღმაშენებლის" დეპუტატი კობა გურული.

ქუთაისის საკრებულომ ქალაქის 2024 წლის ბიუჯეტი პროექტი დღეს, 27 დეკემბერს, დაამტკიცა. ქალაქის მთავარ ფინანსურ დოკუმენტს საკრებულოს უმრავლესობის დეპუტატებმა დაუჭირეს მხარი.

ბიუჯეტის პროექტის მოცულობა 115 მილიონ 510, 700 ლარს შეადგენს, რაც მიმდინარე წლის დამტკიცებულ ბიუჯეტთან შედარებით 14 მილიონით მეტია.