ქუთაისიპოსტი

ქუთაისში, კაფე-ბარ ,,სავანესთან’’ ქალაქის მერიისა და აღსრულების ბიუროს წარმომადგენლები იმყოფებიან, რომლებმაც გამოსახლება უნდა დაიწყონ. 
ადგილზე ასევე, შეკრებილნი არიან კაფის მფლობელები და მათი მხარდამჭერები, რომლებიც ამბობენ, რომ ,,სავანეს’’ დანგრევას არ დაუშვებენ.

აქციის მონაწილეებმა ქუთაისის მერიის წარმომადგენლებს ჰკითხეს, რატომ არ ელოდებიან სააპელაციო სასამართლოს გადაწყვეტილებას ობიექტის დემონტაჟის შესახებ, რომლის პროცესიც 1 თებერვალს არის ჩანიშნული? რაზეც მერიის წარმომადგენლებმა უპასუხეს, რომ საქალაქო სასამართლოს დაუყოვნებლივი აღსრულების გადაწყვეტილება მიიღო.

"მართლია, დაუყოვნებლივი აღსრულებაც გასაჩივრებულია, მაგრამ გასაჩივრება აღსრულებას ხელს არ უშლის. გთხოვთ, გამოიტანეთ თუ რაიმე ღირებულია", - ამბობს ქუთაისის მერიის წარმომადგენელი ავთანდილ ბუცხრიკიძე.

"ჩვენთვის ღირებულია ეს კაფე და ამიტომაც  მას ვერ დაანგრევთ. თქვენ არ იცით ვისთან გაქვთ საქმე", - მიმართეს ,,სავანეს’’ მფლობელებმა მერიისა და აღსრულების ბიუროს წარმომადგენლებს.


ქუთაისის მერიასა და ,,სავანეს’’ მეპატრონეებს შორის ობიექტის დემონტაჟის საკითხზე სასამართლო დავები 13 ოქტომბრიდან მიმდინარეობდა. მერია კაფის დანგრევას და მეპატრონეებისგან 200 ათას ლარამდე საიჯარო დავალიანების გადახდას ითხოვდა. 16 ნოემბერს ქუთაისის საქალაქო სასამართლოს მოსამართლემ დარინა აბულაძემ კვების ობიექტის დემონტაჟის გადაწყვეტილება მიიღო. რაც შეეხება მეპატრონეებისგან საიჯარო თანხის გადახდას, ამ ნაწილში მერიის მოთხოვნა არ დაკმაყოფილდა.

მანამდე კი, 4 წლით ადრე, ქუთაისის მერიასა და კაფე-ბარ ,,სავანეს’’ მფლობელებს შორის დავა იმ მიწის საკითხზე მიმდინარეობდა, რომელზეც სავანე დგას. კაფის მფლობელები ამბობდნენ, რომ შენობასთან ერთად მათ მიწაც იყიდეს და ის მათი საკუთრებაა, მერიაში კი აცხადებდნენ, რომ ,,სავანე’’ კულტურული მემკვიდრეობის ტერიტორიაზეა აშენებული და ის სკვერს წარმოადგენს, სკვერი კი კერძო საკუთრება ვერ იქნება. სასამართლო დავების შედეგად, ორივე ინსტანციის სასამართლომ მიწის მესაკუთრედ მერია აღიარა.

ქალაქის ცენტრალურ ბაღში კაფე 23 წლის განმავლობაში მუშაობდა. კვების ობიექტს 2018 წლიდან აღარ უმუშავია. 90–იან წლებში ის ბამბუკის მსუბუქ კონსტრუქციას წარმოადგენდა, სადაც ღია სანაყინე ფუნქციონირებდა. ობიექტს თავდაპირველად ამხანაგობა „მაგნოლია“ ფლობდა. 1995 წელს კი ის შპს „ნიკოლომ“ 8 986 ამერიკულ დოლარად შეისყიდა.