ქუთაისიპოსტი

საქართველოს დაცულმა ტერიტორიებმა, მიმდინარე წლის 10 თვეში, 1 015 024 ვიზიტორი მიიღო.
ეს მაჩვენებელი გასული წლის ანალოგიურ პერიოდთან შედარებით 19%-ით მეტია.

ამასთან, დაცული ტერიტორიების სააგენტოს ინფორმაციით, 2022 წელთან შედარებით, 29%-ით არის გაზრდილი უცხოელ ვიზიტორთა რაოდენობაც. კერძოდ, 2023 წელს, დაცული ტერიტორიების ვიზიტორთა შორის 58%, ანუ 589 841 ვიზიტორი, სხვა ქვეყნის მოქალაქეა.

სააგენტოს ცნობითვე, 2023 წელს ყველაზე მეტი ვიზიტორი მარტვილის კანიონს, პრომეთეს მღვიმეს, მტირალას ეროვნულ პარკს, სათაფლიასა და წალკის კანიონს ესტურა.

აღსანიშნავია, რომ საქართველოს დაცულ ტერიტორიებზე ვიზიტორთა რეკორდული რაოდენობა 2019 წელს დაფიქსირდა. მიმდინარე წლის 10 თვეში კი 2019 წლის მონაცემები, როგორც სააგენტოში განმარტავენ, 90%-ით არის აღდგენილი.

„დაცული ტერიტორიების სააგენტო აქტიურად განაგრძობს ქვეყანაში ეკოტურიზმის განვითარებას. მიმდინარე წელს, ეკოტურიზმის განვითარებისთვის, სხვადასხვა დაცულ ტერიტორიაზე, 22,5 მილიონამდე ლარის ინვესტიცია განხორციელდება. 15 დაცულ ტერიტორიაზე მიმდინარეობს 1 200 კმ-მდე სიგრძის საფეხმავლო ბილიკების და თანმდევი ტურისტულ-რეკრეაციული ინფრასტრუქტურის სარეაბილიტაციო და მოსაწყობი სამუშაოები, რათა კიდევ უფრო კომფორტული და უსაფრთხო გახდეს დაცულ ტერიტორიებზე მოგზაურობა“,- აღნიშნულია სააგენტოს ინფორმაციაში.