ქუთაისიპოსტი

პარლამენტის თავმჯდომარის პირველ მოადგილეს, გიორგი ვოლსკს „საპატიო ხარაგაულელის“ წოდება მიენიჭა.
მას აღნიშნული წოდების დამადასტურებელი დიპლომი და მოწმობა ხარაგაულის მერმა, კობა ლურსმანაშვილმა გადასცა.

მერის განმარტებით, გიორგი ვოლსკის დედა ხარაგაულის სოფელ ლაშედანაა, ამიტომ პოლიტიკოსისთვის ეს მუნიციპალიტეტი მშობლიურია და ყოველთვის გამოხატავს მის მიმართ მხარდაჭერას.

„მას განსაკუთრებული სიყვარული აქვს სოფელ ლაშესთან და მაჭავარიანების გვართან, რადგან გიორგი ვოლსკის დედა ლაშელი მეგი მაჭავარიანია. ხარაგაულის და სოფელი ლაშეს განსაკუთრებული სიყვარულის ნიშნად, ხარაგაულისთვის ძალიან სასიამოვნო და საამაყოა, რომ სხვადასხვა პერიოდში, ყოველთვის ვგრძნობდით მის მხარდაჭერას. აღნიშნულიდან გამომდინარე, მქონდა პატივი, ხარაგაულისა და ქვეყნის წინაშე გამოჩენილი განსაკუთრებული დამსახურებისთვის, „ხარაგაულის საპატიო მოქალაქის“ წოდების მისანიჭებლად ხარაგაულისთვის ბატონი გიორგი ვოლსკის კანდიდატურა წარმომედგინა“, - განაცხადა კობა ლურსმანაშვილმა.

გიორგი ვოლსკთან ერთად, მერმა, საპატიო ხარაგაულელის წოდებაზე, საზოგადოებას საქართველოს საავტომობილო გზების დეპარტამენტის თავმჯდომარე, გიორგი წერეთელი წარუდგინა.

მიზეზად მერმა აქაც ხარაგაულის მშობლიურობა და ინფრასტრუქტურული პროექტების მხარდაჭერა დაასახელა. 

,,იგი ყოველთვის აქტიურად უჭერს მხარს ხარაგაულში ინფრასტრუქტურული პროექტების განხორციელებას. პატივისცემისა და მადლიერების ნიშნად ხარაგაული მას საპატიო ხარაგაულელის ჯილდოს გადაცემს",- აღნიშნა  კობა ლურსმანაშვილმა. 

მიმდინარე წელს, მერის ბრძანების საფუძველზე, საპატიო ხარაგაულელის ტიტულით 6 ადამიანი დაჯილდოვდა.

საპატიო ხარაგაულელების წოდება ასევე მიენიჭათ ზვარის საჯარო სკოლის დირექტორს, საქართველოს დამსახურებულ მასწავლებელს, ნატო შათირიშვილს; ცნობილ მეთუნეს ზალიკო ბოჟაძეს; პროფესორს, მედიცინის მეცნიერებათა დოქტორს,ორთოპედიისა და ტრავმატოლოგიის ცენტრის ხელმძღვანელს, ლუხუმი ჭანტურიას და ცნობილ მომღერალს, ანსამბლ ,,ფორტე"-ს წევრს ზურა მანჯავიძეს.

როგორც ხარაგაულის მუნიციპალიტეტის მერიაში განმარტავენ, საპატიო ხარაგაულელების კანდიდატების დამტკიცებას სპეციალური კომისია უზრუნველყოფს და ეს მერის ერთპიროვნული გადაწყვეტილება არაა. 

მათივე ინფორმაციით, 2014 წლიდან დღემდე, საპატიო ხარაგაულელის წოდებით 46 ადამიანი დაჯილდოვდა.