ქუთაისიპოსტი

წყალტუბოს სურსათის ბაზრის მოვაჭრეების პროტესტის მიუხედავად, მერიაში გარევაჭრობის პრობლემას არ აღიარებენ. 
მაშინ, როცა მოვაჭრეები, მყიდველთა სიმცირეს ზუსტად იმის გამო უჩივიან, რომ ბაზრის შესასვლელთან და მიმდებარე ტერიტორიაზე გარემოვაჭრეები სხედან.

"ვერანაირ სარგებელს ვერ ვნახულობთ, ვიხდით დახლის საფასურსაც, დღეში - 4 ლარს. თუკი კანონმორჩილები უნდა ვიყოთ, მაშინ კანონს დაემორჩილონ ის ადამიანებიც, რომლებიც ბაზრის გარეთ ვაჭრობენ. ცარიელია შიგნით დახლები, შემოვიდნენ აქ და ივაჭრონ“, - ამბობს მოვაჭრე თამარა ალხაზაშვილი.

მისივე თქმით, წყალტუბოს მერიას, პრობლემის აღმოსაფხვრელად, რამდენჯერმე მიმართეს, თუმცა უშედეგოდ. 

საკითხთან დაკავშირებით, ჩვენ მიერ წყალტუბოს თვითმმართველობიდან გამოთხოვილ წერილში, ვკითხულობთ, რომ გარევაჭრობის მონიტორინგს მერიის ზედამხედველობის, სივრცითი მოწყობისა და არქიტექტურის სამსახური ახორციელებს, თუმცა, როგორც ჩანს, აღნიშნული სამსახური ქალაქში გარევაჭრობის მასიურ სახეს "ვერ ხედავს".

"წყალტუბოს მუნიციპალიტეტში არ აქვს მასიური სახე კონკრეტულ ადგილებზეგარე ვაჭრობის ფაქტებს, თუმცა ასეთ შემთხვევაში, ხდება გარე მოვაჭრისათვის ალტერნატიული, გენგეგმით ვაჭრობისათვის გათვალისწინებული ადგილების შეთავაზება",- აღნიშნულია წყალტუბოს მუნიციპალიტეტიდან მიღებულ ოფიციალურ წერილში.

წყალტუბოს ბაზარში 50-ზე მეტი მოვაჭრეა აღრიცხული.

გარევაჭრობა კანონით აკრძალული საქმიანობაა. ის ადმინისტრაციულ სამართალდარღვევათა კოდექსის 153-ე პრიმა მუხლის თანახმად ისჯება. კოდექსის თანახმად, გარევაჭრობა გამოიწვევს დაჯარიმებას 20-დან 50 ლარამდე. ხოლო გარემოვაჭრე, რომელიც არ დაემორჩილება სამართალდამცავი ორგანოს უფლებამოსილი პირის კანონიერ განკარგულებას ან მოთხოვნას, დაჯარიმდება 50-დან 100 ლარამდე, ან ადმინისტრაციული პატიმრობით 7 დღემდე ვადით.

ამავე თემაზე:

"გვიფუჭდება პროდუქტი, ვზარალდებით"- წყალტუბოს ბაზრის მოვაჭრეები გარევაჭრობას აპროტესტებენ