ქუთაისიპოსტი

კელი დეგნანი, ქუთაისში ყოფნისას, ჟურნალისტებთან ბათუმის პორტში რუსული საკრუიზო ლაინერის შემოსვლას და ამაზე ქართველი ხალხის პროტესტს გამოეხმაურა.
საქართველოში აშშ-ის ელჩის განცხადებით, არავინ უნდა ელოდოს, რომ ქართველები რუსების საქართველოში შემოსვლას მიესალმებიან.

"არ აქვს მნიშვნელობა მე რას ვფიქრობ, მთავარია, რას ფიქრობს ქართველი ხალხი და ეს მათ ძალიან მკაფიოდ და ნათლად აჩვენეს. არავინ არ უნდა ელოდოს ქართველებისგან, რომ მიესალმებიან იმ ქვეყნიდან ჩამოსულ ხალხს, რომელიც ახორციელებს საქართველოს ტერიტორიების 20%-ის ოკუპაციას. მაშინ, როცა ხელოვნურად შექმნილი გამყოფი ზოლით ის ოჯახებს ყოფს. მაშინ, როცა აკავებენ საქართველოს მოქალაქეებს და ხანდახან თვეობით ჰყავთ ისინი ტყვეობაში და არ უშვებენ. ასევე, მნიშვნელობა არ აქვს ხმელეთით შემოვა, თუ ზღვით. რა თქმა უნდა, საქართველოს მოსახლეობა მათ არ მიესალმება და ისინი გამოთქვამენ პროტესტს“,- განმარტა კელი დეგნანმა.

მისივე თქმით, ეს უფლება მათ საქართველოს კონსტიტუციით აქვთ გარანტირებული. 

კელი დეგნანმა საქართველოსა და ჩინეთის სტრატეგიული პარტნიორობის შესახებ მედიის წარმომადგენლების მიერ დასმულ შეკითხვასაც უპასუხა. მისი თქმით, საქართველოს მთავრობის საქმეა, რა სახის ურთიერთობა სურს ჩინეთთან და ვინ იქნება მისი პარტნიორი.

„რა თქმა უნდა, საქართველოს მთავრობის არჩევანია, რა სახის ურთიერთობა სურს ჩინეთთან. ბევრი ქვეყანა ზურგს აქცევს „ერთი სარტყელისა და გზის ინიციატივას“, ეს მას შემდეგ ხდება, რაც რამდენიმეწლიანი დაკვირვების შემდეგ გამოჩნდა, რომ ეს ინიციატივა არც ისეთი სასარგებლო იყო მათი ქვეყნებისთვის. თუ საქართველო გადაწყვეტს, რომ ეს ინიციატივა გამოიყენოს, იმედს ვიტოვებ, რომ ეს კარგ შედეგებამდე მიიყვანს. ჩანდა, რომ ეს ვიზიტი საქართველოსთვის მნიშვნელოვანი იყო",- განაცხადა საქართველოში აშშ-ის ელჩმა.

კელი დეგნანმა აღნიშნა ისიც, რომ აშშ რჩება ჩვენი ქვეყნის მტკიცე მხარდამჭერად, როგორც ეს იყო გასული 30 წლის განმავლობაში და რამაც მოიტანა ხელშესახები სარგებელი საქართველოსთვის.

კელი დეგნანი დღეს ქუთაისის საერთაშორისო აეროპორტში იმყოფებოდა, სადაც მან ამერიკული სწრაფი მომსახურების რესტორანი Subway გაიხსნა.