ქუთაისიპოსტი

პარტია „საქართველოსთვის“ გადაწყვეტილებით, ქუთაისის საკრებულოს წევრი ნინო ჩიკვაშვილი პარტიიდან გაირიცხა.
ამის შესახებ პარტია "საქართველოსთვის" აღმასრულებელმა მდივანმა, ბერდია სიჭინავამ ბრიფინგზე განაცხადა.

„მიუხედავად იმ უმძიმესი ტრაგედიისა, რაც გუშინ დედაქალაქში მოხდა და ფაქტობრივად მთელი ქვეყანა გარდაცვლილ ბავშვს გლოვობს და ამ ტრაგედიის გარშემოა გაერთიანებული, „ქართული ოცნება“ იცლის იმისთვის, რომ უღირსად გააგრძელოს ბრძოლა ჩვენი პოლიტიკური პარტიის წინააღმდეგ მთელი ქვეყნის მასშტაბით.

პარტია „საქართველოსთვის“ გადაწყვეტილებით, ქუთაისის საკრებულოს წევრი ნინო ჩიკვაშვილი გარიცხულია პარტიის რიგებიდან. ნინო ჩიკვაშვილს, რომელიც ქუთაისის საკრებულოს წევრი ჩვენი პარტიის სიით გახდა, ბოლო რამდენიმე თვის განმავლობაში აქტიურად აშანტაჟებდნენ მის საკუთრებაში არსებული კერძო სკოლების ფინანსური სანქციებით და ზეწოლის სხვადასხვა მექანიზმებით. ნინო ჩიკვაშვილზე ზეწოლა ხორციელდებოდა სახელმწიფო უსაფრთხოების სამსახურის, შემოსავლების სამსახურისა და ადგილობრივი თვითმმართველობის მიერ", - განაცხადა ბერდია სიჭინავამ.

მისივე განცხადებით, ხელისუფლების მხრიდან იყო შემდეგი შემოთავაზება, რომ ნინო ჩიკვაშვილი უნდა წასულიყო პარტიიდან, ოღონდ დარჩენილიყო საკრებულოში დამოუკიდებელ დეპუტატად.

როგორც ბერდია სიჭინავა აღნიშნავს, სანაცვლოდ „ოცნება“ მას ფინანსური სანქციების საკითხის მოგვარებას, ხოლო ბონუსის სახით დამატებითი შესაძლებლობის არხების გახსნას სთავაზობდა.

„ხელისუფლების მხრიდან პირობა იყო შემდეგი: ის უნდა წასულიყო პარტიიდან, ოღონდ დარჩენილიყო საკრებულოში ფსევდო “დამოუკიდებელ დეპუტატად”. სანაცვლოდ „ოცნება“ მას ფინანსური სანქციების საკითხის მოგვარებას, ხოლო ბონუსის სახით დამატებითი შესაძლებლობის არხების გახსნას სთავაზობდა. ნინო ჩიკვაშვილს რამდენიმე თვის განმავლობაში ჩვენი გუნდი ვთავაზობდით, რომ „ქართული ოცნების“ წნეხისა და ზეწოლის შესახებ მას ღიად, საჯაროდ ესაუბრა და ჩვენი გუნდი მას, ბუნებრივია, მხარში დაუდგებოდა, როგორც ყველა სხვა შემთხვევაში.

თუმცა, საბოლოო ჯამში ჩიკვაშვილმა ვერ გაუძლო „ოცნების“, სუს-ის და შემოსავლების სამსახურის წნეხს და სრულად დაჰყვა მათ მოთხოვნებში. ის ხალხი, ვინც „ოცნებას“ მიჰყიდის სულს, მათგან აიღებს ფულს და იცხოვრებს იმ იმედით, რომ სახელმწიფოს განვითარების დიდ იდეას ანაცვალოს საკუთარი მერკანტილური ინტერესი, ჩვენს გვერდით ვერ იქნება.

საზოგადოება იმაზეც უკვე თანხმდება, რომ დღევანდელმა „ოცნებამ“ სრულად შეითავსა მართვის ის მახინჯი მეთოდები, რომელიც „ნაციონალური მოძრაობის“ ხელისუფლებას ბოლო წლებში ახასიათებდა - მათი ეს მსგავსება არამხოლოდ პოლიტიკურ საქმიანობაში, არამედ ადამიანების მიმართ დამოკიდებულებაშიც გამოიხატება. ჩვენი გუნდი პოლიტიკაში ამ სიბინძურის დასამარცხებლად იბრძვის და დავამარცხებთ კიდეც. „ოცნების“ სურვილის მიუხედავად ეს მაინც მოხდება. ამას გავაკეთებთ ჩვენ", - განაცხადა ბერდია სიჭინავამ.