ქუთაისიპოსტი

აშშ-ს პრეზიდენტმა, ჯო ბაიდენმა, დიდი ბრიტანეთის პრემიერ-მინისტრმა, ბორის ჯონსონმა და კანადის პრემიერ-მინისტრმა, ჯასტინ ტრუდომ განაცხადეს, რომ უკრაინას დამატებით მძიმე არტილერიას გადასცემენ.
სატელეფონო საუბარი უკრაინის საკითხზე შედგა ბაიდენს, ტრუდოს, ევროკომისიის პრეზიდენტ ურსულა ფონ დელ ლეიენს, საფრანგეთის პრეზიდენტ ემანიულ მაკრონს, გერმანიის კანცლერ ოლაფ შოლცს, NATO-ს გენერალურ მდივან იენს სტოლტენბერგს, ასევე იტალიის, იაპონიის და პოლონეთის ლიდერებს.

საუბრის შემდეგ ბორის ჯონსონმა კანონმდებლებს უთხრა, რომ საარტილერიო მხარდაჭერა არის ის, რაც უკრაინას ახლა ყველაზე მეტად სჭირდება - დიდი ბრიტანეთი კი, მათ მძიმე არტილერიას გადასცემს.

აშშ პირველად დათანხმდა, რომ კიევს მიაწოდოს ისეთი მაღალი სიმძლავრის შესაძლებლობის მქონე სამხედრო ტექნიკა, რომელსაც რამდენიმე კვირის წინ ბაიდენის ადმინისტრაციის წარმომადგენელთა ნაწილი ესკალაციის საფრთხედ აღიქვამდა. დახმარების პაკეტში შედის საბჭოთა წარმოების Mi-17-ის ტიპის ვერტმფრენები, ჰაუბიცები და Switchlade-ის უპილოტო საფრენი აპარატები.

თეთრი სახლის პრესსპიკერის, ჯენ ფსაკის განცხადებით,ლიდერებმა განიხილეს უკრაინის უსაფრთხოებისა და ეკონომიკური დახმარების გეგმები. მისივე განმარტებით, აშშ რუსეთის წინააღმდეგ სანქციების მორიგ პაკეტს ამზადებს.

საფრანგეთის პრეზიდენტის მრჩეველმა განაცხადა, რომ მოკავშირეებმა განიხილეს ისიც, თუ როგორ უნდა უზრუნველყონ უკრაინის უსაფრთხოება ომის შემდეგ, თუ ის არ იქნება NATO-ს წევრი და შესაბამისად, ქვეყანაზე სამხედრო ალიანსის მე-5 მუხლი არ გავრცელდება.

"ჩვენი ქვეყანა მზად არის, გახდეს უკრაინის უსაფრთხოების გარანტორი.გარანტიები, რომელსაც უკრაინას ვთავაზობთ, NATO-ს მე-5 მუხლზე მეტად ევროკავშირის თავდაცვის პუნქტს ჰგავს". - ამბობს ფრანგი მაღალჩინოსანი.

უკრაინაში 56 დღეა ომია.

რუსეთი სუვერენულ უკრაინას თავს 24 თებერვალს დაესხა. რუსულმა არმიამ მოკლა ათასობით მშვიდობიანი მოქალაქე, მიწასთან გაასწორა ქალაქები და დასახლებული პუნქტები. ქვეყნის ჩრდილოეთით უკრაინელებმა განდევნეს რუსი ოკუპანტები დაკავებული ტერიტორიებიდან.