ახალი ამბები
საქართველოს მთავრობა პრეზიდენტის წინააღმდეგ სასამართლო დავას იწყებს
13:03 / 15.03.2022
საქართველოს მთავრობა პრეზიდენტ
სალომე ზურაბიშვილს საკონსტიტუციო სასამართლოში უჩივის.
მმართველ პარტიას პრეზიდენტის
გადაცდომები და "დანაშაულებები" მისი გუშინდელი კრიტიკული გამოსვლის
შემდეგ გაახსენდა.
"ქართული ოცნება" აცხადებს, რომ
სალომე ზურაბიშვილმა კონსტიტუცია დაარღვია.
მმართველი პარტიის პოლიტსაბჭოს
განცხადებაში წერია, რომ გასული ერთი წლის განმავლობაში, იყო არაერთი
შემთხვევა, როდესაც პრეზიდენტმა მთავრობის მიერ წარდგენილი ელჩის თუ
დიპლომატიური წარმომადგენლის დანიშვნაზე უარი განაცხადა, რაც
მთავრობის განმარტებით, საქართველოს კონსტიტუციას უხეშად
ეწინააღმდეგება.
"საგარეო პოლიტიკის
განხორციელების ერთ-ერთი უმნიშვნელოვანესი ინსტრუმენტია ელჩებისა და
სხვა დიპლომატიური წარმომადგენლების დანიშვნა. შესაბამისი აქტი
პრეზიდენტისა და პრემიერ-მინისტრის თანახელმოწერით გამოიცემა, ამგვარ
აქტზე კი, კონსტიტუციის თანახმად, პოლიტიკური პასუხისმგებლობა მხოლოდ
მთავრობას ეკისრება. ეს ნიშნავს, რომ ელჩის განწესების მატერიალურ
უფლებამოსილებას კონსტიტუცია მთავრობას ანიჭებს, პრეზიდენტს კი ამ
სფეროში მხოლოდ სამართლებრივი და ცერემონიული უფლებამოსილება აქვს
მინიჭებული.
ამასთან, თანახელმოწერის
დათქმაც რომ არ იყოს დადგენილი, ყველა საპარლამენტო რესპუბლიკაში
ელჩის დანიშვნის უფლებამოსილება სწორედ ამ სახით განიმარტება -
პრეზიდენტი ელჩებს ფორმალურად ნიშნავს, მათ შერჩევაზე კი,
პოლიტიკურ-პრაქტიკული თვალსაზრისით, მთავრობაა პასუხისმგებელი. გასული
ერთი წლის განმავლობაში, იყო არაერთი შემთხვევა, როდესაც პრეზიდენტმა
მთავრობის მიერ წარდგენილი ელჩის თუ დიპლომატიური წარმომადგენლის
დანიშვნაზე უარი განაცხადა, რაც საქართველოს კონსტიტუციას უხეშად
ეწინააღმდეგება.
გასული თვეების
განმავლობაში შედგა არაერთი შეხვედრა მთავრობის წარმომადგენლებსა და
პრეზიდენტს შორის, სადაც პრეზიდენტს არაერთგზის ნათლად განემარტა
საქართველოს კონსტიტუციის შინაარსი, თუმცა, სამწუხაროდ, უშედეგოდ. ამ
პირობებში, საქართველოს მთავრობა იძულებული ხდება, უახლოეს მომავალში
მიმართოს საკონსტიტუციო სასამართლოს კომპეტენციების შესახებ დავის
პროცედურის ფარგლებში და საქართველოს პრეზიდენტის მხრიდან
კონსტიტუციის დარღვევის დადასტურება მოითხოვოს", - წერია
"ქართული ოცნების" პოლიტსაბჭოს განცხადებაში.
მმართველ პარტიას თავის
განცხადებაში ვრცლად აქვს მოყოლილი სხვა დანარჩენი "დანაშაულებები" და
გადაცდომები, რომელსაც მთავრობისვე მტკიცებით, დიდი ხანია პრეზიდენტი
ჩადის, თუმცა, ფაქტია, რომ მმართველი გუნდი რეალურად 14 მარტს სალომე
ზურაბიშვილის გამოსვლის ტექსტმა გააღიზიანა, სადაც პრეზიდენტმა
ხელისუფლებას უთხრა, რომ ქართველი ხალხი მათზე უფრო ფხიზელი, მტკიცე
და ერთიანია.
"გუშინ, ჩვენ ასევე
მოვისმინეთ საქართველოს პრეზიდენტის რამდენიმე გაუგებარი განცხადება
მიმდინარე პროცესებთან დაკავშირებით. მათ შორის, ერთ-ერთი
"გამორჩეული" იყო შემდეგი ფრაზა - "ხელისუფლება სცოდავს, როცა ვერ
ბედავს გამოხატოს ის, რასაც ჩვენი ისტორია და ღირსება გვკარნახობს".
ამასთან, ამგვარი შეურაცხმყოფელი ფრაზის მიღმა, მას არ
დაუკონკრეტებია, თუ რას გულისხმობს ხელისუფლების გაუბედავ და უღირს
მოქმედებაში.
შეგახსენებთ, რომ ჩვენმა
ხელისუფლებამ მკაფიო პოზიცია გამოხატა ყველა საერთაშორისო ფორუმზე,
ყველა პოლიტიკური გადაწყვეტილების მიღებისას, რომელიც უკრაინის
სუვერენიტეტისა და ტერიტორიული მთლიანობის მხარდაჭერასა და რუსული
აგრესიის მიმართ რეაგირებას უკავშირდებოდა - იქნებოდა ეს ევროსაბჭოში
რუსეთისთვის წევრის სტატუსის შეჩერება, გაეროს რეზოლუციის
თანასპონსორობა, ჰააგაში შეტანილი საჩივრის თანაავტორობა თუ სხვა. თუ
პრეზიდენტი გულისხმობს იმას, რომ საქართველო სანქციებს უნდა
მიერთებოდა და ომში უნდა ჩართულიყო, კეთილი ინებოს, თავად გამოიჩინოს
გამბედაობა და ეს ღიად თქვას", - ნათქვამია
განცხადებაში.
"ქართული ონების" პოლიტსაბჭო
მოუწოდებს პრეზიდენტს, საქართველოს კონსტიტუცია კარგად წაიკითხოს და
შემდეგ გაიაზროს "საპარლამენტო რესპუბლიკის არსი, რომლის
დამკვიდრებაში მას, როგორც საქართველოს პარლამენტის წევრს, 2017 წელს
უშუალო მონაწილეობა აქვს მიღებული".
სალომე ზურაბიშვილი ყოველწლიური
ანგარიშით საკანონმდებლო ორგანოში 14 მარტს წარსდგა. მან თავის
გამოსვლაში როგორც მმართველი გუნდი, ასევე ოპოზიცია მწვავედ
გააკრიტიკა.
მსგავსი სიახლეები
14:59 / 23.11.2024
24 ნოემბრიდან, საქართველოს ტერიტორიის უმეტეს ნაწილში, ამინდი
გაუარესდება.
14:26 / 23.11.2024
თურქეთის ტერიტორიაზე მოსალოდნელი ქარიშხლისა და ძლიერი შტორმის გამო,
ავიარეისები გაუქმდა.
ეკონომიკის სიახლეები
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.
მასალის გამოყენების პირობები