ქუთაისიპოსტი

ქუთაისში ბოლო ცხრა თვის განმავლობაში სოციალური შემწეობის მიმღებთა რაოდენობამ მოიმატა.
მაია ბობოხიძე ერთ-ერთია იმ 762 ოჯახიდან, რომელსაც სოციალური შემწეობა სულ რამდენიმე თვეა დაენიშნა.

მაია პანდემიამდე  სურსათის მაღაზიაში მუშაობდა, თუმცა მეპატრონემ მცირე შემოსავლების გამო,  იძულებული გახდა  ობიექტი დაეკეტა. 

ორი შვილის დედა ახლა უმუშევარია. 

"ოთხსულიან ოჯახს მხოლოდ ერთი ადამიანი, ჩემი მეუღლე არჩენს, რომელიც ტვირთის გადატანაზე მუშაობს. საქმე ის არის, რომ ეს სამუშაოდ ყოველდღე არ არის", - გვიყვება მაია. 

შემოსვალის გარეშე დარჩენილი ოჯახი იძულებული გახდა სოციალური სააგენტოსთვის მიემართა და განაცხადიც დაწერა. 

"დახმარება აპრილის ბოლოს დაგვენიშნა და სულ 320 ლარია.  ეს არის ის თანხა, რომელიც ძირითადი შემოსავალია ჩვენი ოჯახისთვის.  წარმოიდგინეთ, რამდენად რთულია ამ თანხით თავის გატანა, მაშინ როცა,  ყველაფერის ფასმა მოიმატა. ეს არის სრული სიღარიბე".

ქუთაისში სოციალურად დაუცველთა მონაცემთა ერთიან ბაზაში სულ 7 400 ბენეფიციარია რეგისტრირებული. სოციალურ შემწეობას კი 3 231 ოჯახი იღებს.

საარსებო შემწეობის მიმღებთა ზრდა პანდემიას უკავშირდებოდა, რადგან სწორედ ბოლო ორი წლის განმავლობაში  ბევრმა მოქალაქემ სამუშაო დაკარგა. 

სოციალური მომსახურების იმერეთის ცენტრის ხელმძღვანელის ნინო ჭიღლაძის ინფორმაციით, მომსახურების ცენტრში თითქმის ყოველდღე ითხოვენ სოციალურად დაუცველი პირის სტატუსს.

ნინო ჭიღლაძის თქმით, სოციალური აგენტები კვირაში საშუალოდ 25 ოჯახს ამოწმებენ.

,,გაორმაგებულია მომართვიანობა, რის გამოც  აგენტებს დღეში საშუალოდ 25 ოჯაახის შემოწმება უწევთ".




კოვიდპანდემიის გამო, სოციალური მომსახურების სააგენტოს ხელმძღვანელების გადაწყვეტილებით, ბოლო ერთი წელია  სოციალურად დაუცველებს სტატუსის გადამოწმების პერიოდში შემწეობის მიღება არ უწყდებათ.

იმერეთის რეგიონში ნოემბრის მონაცემებით 82 216 ადამიანია სოციალურად დაუცველი, რაც ადგილობრივი მოსახლეობის 15,1%-ია.