ახალი ამბები
მიხეილ სააკაშვილის წერილი გლდანის ციხიდან
10:33 / 09.11.2021
საქართველოს მესამე პრეზიდენტი, გლდანის ციხეში
გადაყვანის შემდეგ, პირველ წერილს აგზავნის.
სააკაშვილის წერილი მისმა
ადვოკატმა, ნიკა გვარამიამ ბრიფინგზე წაიკითხა:
"მე აქ გადმომიყვანეს
მოტყუებით, მას შემდეგ, რაც გამომიცხადეს, რომ ქალაქის
რეგულარულ კლინიკაში მივყავდი, გამიუქმეს შეხვედრა ექიმებთან და
პაემანი დედაჩემთან და ჩემს შვილებთან. როდესაც მიმიყვანეს
კრიმინალების კორპუსთან, რომელთაც ატეხეს დიდი ჟრიამული და ეს
ჟრიამული არ შეწყვეტილა ამ წუთამდე, ხოლო ციხის ერთ-ერთმა
წარმომადგენელმა, როგორც ჩანს ხელმძღვანელმა მუშაკმა, გამომიცხადა:
აჰა, ჩიტო, ხომ ჩაგიგდეთ ხელში და გინებაც მოაყოლა, მე
მოვითხოვე მისი სახელი და გვარი, თუმცა უარი მითხრეს თქმაზე. შემდეგ
გაფრთხილების გარეშე დაიწყეს ჩემი გადმოთრევა თანამშრომლებმა.
მიუხედავად ჩემი კატეგორიული უარისა, გადმომათრიეს მანქანიდან,
კრიმინალების გინების ქვეშ გამათრიეს მიწაზე და რამდენჯერმე ჩამარტყეს
კისერში, მითრიეს თმებით და რა თქმა უნდა, ამ დროს გავუწიე
წინააღმდეგობა. ისევე, როგორც პალატაში, სადაც რაღაც გაურკვეველი,
კრიმინალური შესახედაობის მედპერსონალი მომიახლოვდა და ამ დროს
მართლაც ანალიზატორს გავკარი ხელი, რადგან რაღაც ნემსის გაკეთება
დაიწყეს ჩემი ნებართვის გარეშე. ჩემი რეაქცია იყო გამოწვეული მთელი ამ
ძალადობისა და შეურაცხყოფის შემდეგ აღელვებით. ყველა იქცეოდა, როგორც
ნამდვილი კრიმინალები. ჩემს საკანში მუდმივად ისმის კრიმინალების
შეძახილის ხმა. ვაცხადებ ყველანაირ სამედიცინო ჩარევაზე უარს,
სამედიცინო პერსონალთან არ ვთანამშრომლობ, შევხვდები მხოლოდ ჩემს
პირად ექიმს. აქ ჩემი გადმოყვანის მიზანი ერთმნიშვნელოვნად არის ჩემი
ფიზიკური განადგურება პუტინის დაკვეთით.
მინდა, არ მივცეთ არანაირი
პროვოკაციის შესაძლებლობა. მე ვალდებული ვიყავი, გამეწია ფიზიკური
წინააღმდეგობა ძალადობისთვის, მაგრამ მე აქ მარტო ვიყავი, ხოლო თქვენ
გარეთ ხართ უამრავი და შესაბამისად, ვერავინ დაგამარცხებთ
მშვიდობიანი, მაგრამ ძალიან მტკიცე პროტესტის პირობებში. კიდევ
ერთხელ, არ წამოვეგოთ მათ პროვოკაციებს. ჩვენი ერთიანობით,
მშვიდობიანობით უნდა გადავარჩინოთ ჩვენი ქვეყანა, რომელიც ბანდიტებს
ჩაუვარდათ ხელში და დაღუპვის პირასაა. მინდა, ხელახლა ვთხოვო
ემიგრაციას, ახლა არის მომენტი, აჩუქოთ საქართველოს თუნდაც ერთი ან
რამდენიმე დღე და ბოლომდე მივიყვანოთ საქმე. ძალიან დიდი იმედი მაქვს
ყველა თქვენგანის, არ შეგვეშინდეს ამათი, ჩვენ ბევრად მეტნი ვართ და
რაც მთავარია, მართალი ვართ და ჩვენი ქვეყანა, ჩვენი ოჯახები, ჩვენი
სამშობლო გვაქვს გადასარჩენი.
პოსტ სკრიპტუმ: მიმართვა ნიკა
მელიას – ვიზიარებ და სრულად მხარს ვუჭერ ნიკა შენს გადაწყვეტილებას
გლდანის ციხესთან წამოსვლაზე უარის შესახებ. აქ მზადდებოდა და ახლაც
მზადდება პროვოკაცია, რაც მიზნად ისახავს ჩვენი მშვიდობიანი პროტესტის
ჩაშლას. ყოჩაღ ამისთვის", – ნათქვამია მიხეილ სააკაშვილის
წერილში.
მიხეილ სააკაშვილი რუსთავის #12
პენიტენციური დაწესებულებიდან გლდანში, #18 სამკურნალო დაწესებულებაში
9 ნოემბერს, გვიან ღამით გადაიყვანეს. სააკაშვილის დედა და მისი
მხარდმჭერები ამბობენ, რომ საქართველოს მესამე პრზიდენტი გატაცებით და
მოტყუებით გაიყვანეს.
საქართველოს მესამე პრეზიდენტი მისი
დაკავების დღიდან, უკვე მეორმოცე დღეა პროტესტის ნიშნად შიმშილობს. ის
უკრაინიდან საქართველოში ჩამოსვლის შემდეგ, 1 ოქტომბერს, თბილისში
დააკავეს. ყოფილი პრეზიდენტის გათავისუფლების მოთხოვნით მისი
მხარდამჭერები აქციებს ქვეყნის მასშტაბით მისი დაკავების დღიდან
მართავენ.
მსგავსი სიახლეები
13:22 / 21.11.2024
ქუთაისში, მუხნარის ადმინისტრაციულ ერთეულის მოსახლეობას, 13 100
აბონენტს, სასმელი წყალი არ მიეწოდება.
13:00 / 21.11.2024
19 ნოემბრის აქციაზე დაკავებულ მათე დევიძეს, შესაძლოა ბრალი
გადაუკვალიფიცირდეს.
ეკონომიკის სიახლეები
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.
მასალის გამოყენების პირობები