ქუთაისიპოსტი

დღეს, დილით, რიონის ხეობაში ჰომოფობიური აქციების ორგანიზატორებს გურამ და ალექსანდრე ფალავანდიშვილებსა ხეობის  ერთ-ერთი მცველი მაკა სულაძე  სიტყვიერად დაუპირისპირდნენ.
საუბარი თბილისში აქციიდან ლგბტ სიმბოლიკის გამო მოქალაქეების გაძევებას შეეხებოდა. მაკა სულაძის თქმით, ისინი თავად უზრუნველყოფენ უსაფრთხოებას და თუ ვინმე სიმბოლიკით მივა, მათ შეახსენებენ, რომ სიმბოლიკა და პარტოული დროშა მათ აქციაზე აკრძალულია.

"სამკლაურზე საუბარია? ქვეყანა გამოგვეცალა ხელიდან, თქვენ კიდევ დასდევთ ლგბტ-ებს. ქრისტიანობა რა არის? შემწყნარებლობაა ქრისტიანობა. ურთიერთტვირთი იტვირთეთ და ასე აღასრულეთ რჯული ჩემიო — არ გაგიგონიათ? რა გამოდის, გამაგებინეთ, რიონის ხეობის მცველები თბილისში იმიტომ ჩამოვიდნენ და ხეობაში იმიტომ დავბრუნდით, რომ ვარჩიეთ რომელიმე პროპაგანდა… ის რატომ აკეთებს, ეს რატომ აკეთებს და პარტიების დღის წესრიგები ვარჩიოთ? მე მასწავლით კიდევ ქრისტიანობას, ჯვარს როდის გადავდებ გვერდზე და როდის დავიჭერ ხელში. ვერ შეგაგნებინეთ შემწყნარებლობა. თუ ხართ ჩვენს ომში, კეთილი ინებეთ და დადექით ჯარისკაცად და ჩვენ თვითონ მივუთითებთ, თქვენთვის არ დაგვივალებია. არ არის საჭირო თქვენი ჩარევა", - განაცხადა მაკა სულაძემ.

მაკა სულაძემ განაცხადა, რომ ჯვარს, რომელსაც აქციების განმავლობაში ატარებდა, თბილისში მსვლელობის დროს აღარ ექნებოდა. მიზეზეი, მისი განცხადებით, ის არის, რომ სხვა რელიგიის წარმომადგენლებისთვის უხრეხულობა არ შეექმნა. 

ჰომოფობიური და ულტრანაციონალისტური აქციების ორგანიზატორები, მამა-შვილმა გურამ და ალექსანდრე ფალავანდიშვილებმა 26 მაისს განცხადებას გაავრცელეს და ნამახვანჰესის მოწინააღმდეგე აქტივისტებს გააკრიტიკეს იმისთვის, რომ ისინი “არ გაემიჯნენ ლგბტ აქტივიზმს”.

ნამახვანჰესის მოწინააღმდგეები საპროტესტო აქციას თბილისში 23 მაისიდან ოთხი დღის განმავლობაში მართავდნენ. ხეობის მცველები პროტესტის თავდაპირველ ადგილზე გუშინ, 26 მაისს დაბრუნდნენ, რომლებსაც გუმათჰესთან რკინის ჯებირები და პოლიციის კორდონი დახვდათ.

ნამახვანჰესის წინააღმდეგ პროტესტმა რიონის ხეობიდან დედაქალაქში მოლაპარაკებების ორჯერ ჩაშლის და მათი მოთხოვნების დაუკმაყოფილებლობის შემდეგ გადაინაცვლეს.

24 მაისს აქციის მონაწილეებს შეხვედრა შესთავაზა პარლამენტის თავმჯდომარე, კახა კუჭავა, თუმცა, შეხვერა არ შედგა.

ამის შემდეგ მოძრაობა "რიონის ხეობის გადარჩენისთვის" ლიდერმა და აქციების ორგანიზატორმა, ვარლამ გოლეთიანმა თქვა, რომ თუ მათი მოთხოვნები არ დაკმაყოფილდება.

ხეობის მცველები ითხოვენ:

შეწყდეს "ენკასთან" ნამახვანჰესის მშენებლობის შესახებ გაფორმებული ხელშეკრულება;

კომპანიამ დატოვოს რიონის ხეობა;

გაუქმდეს ის განკარგულება, რომლითაც "ენკას" კონკრეტული ქონება გადაეცა რიონის ხეობაში;

გაუქმდეს ნამახვანჰესის მშენებლობის ნებართვა და გადადგეს ეკონომიკის მინისტრი ნათია თურნავა.

რიონის ხეობის მცხოვრებლები უკვე 212 დღეა უწყვეტად აპროტესტებენ ხეობაში ნამახვანჰესის მშენებლობას. მათი თქმით, გარდა იმისა, რომ ჰესი დააზიანებს ეკოსისტემას, ხელისუფლებამ მშენებელ კომპანიასთან დადებული ხელშეკრულებით სახელმწიფო ინტერესები დათმო.

რიონის ხეობაში 433 მგვტ. სიმძლავრის ჰესს კომპანია "ენკა" აშენებს. მთავრობასა და ინვესტორს შორის გაფორმებული ხელშეკრულება უკვე შეისწავლეს სპეციალისტებმა და მას ქვეყნის ინტერესების საზიანო უწოდეს.