ქუთაისიპოსტი

ქუთაისის 2019 წლის ბიუჯეტი, 26 დეკემბერს, საკრებულოს ბოლო სხდომაზე, ხმათა უმრავლესობით, დაამტკიცეს.
ბიუჯეტს მხარი არ დაუჭირა ოპოზიციამ.

2019 წლის ქალაქის ფინანსური დოკუმენტის მოცულობა 54 992 000 მილიონი ლარია.

მერიის საფინანსო სამსახურის ხელმძღვანელის, დავით ნიშნიანიძის თქმით,  მომავალი წლის ბიუჯეტში პრიორიტეტებად რჩება  ინფრასტრუქტურა და სოციალური პროგრამების მხარდაჭერა. მისი თქმით, მომავალ წელს ინფრასტრუქტურულ პროექტებზე 10 მილიონი ლარია გათვალისწინებული, წლის განმავლობაში კი  მერია რგფ-დან დამატებით ელოდება 16 მილიონი ლარის გადმორიცხვას.

ხარჯვით ნაწილს რაც შეეხება, დავით ნიშნიანიძის თქმით,  4 900 000 ლარამდეა გაზრდილი სოციალური პროგრამების დაფინანსება, კონკრეტულად, გაიზარდა  მრავალშვილიანი დედებისა და აუტისტური სპექტრის მქონე ბავშვებისთვის გათვალისწინებული თანხა.  

დავით ნიშნიანიძემ,  წარმომადგენლობითი ხარჯების გაზრდასთან დაკავშირებით ოპოზიციის ბრალდებებზეც ისაუბრა. მისი თქმით, სინამდვილეში  ბოლო წლებში ამ მიმართულებით 180 000 ლარია დაზოგილი. ადმინისტრაციული ხარჯები  შემცირებულია. 

"იმის მიუხედავად, რომ ბოლო წლების განმავლობაში ჩვენ მოვახერხეთ 180 000-მდე თანხის დაზოგვა წარმომადგენლობითი ხარჯებიდან, დღეს მაინც გვიწევს ოპოზიციასთან თავის მართლება", - ამბობს ნიშნიანიძე.

ოპოზიცია მიიჩნევს, რომ ბიუჯეტი ქალაქის რეალურ საჭიროებებზე არ არის მორგებული. საკრებულოს ფრაქცია "ნაციონალური მოძრაობის"  თავმჯდომარის, გიგა შუშანიას თქმით,  2019 წლის ბიუჯეტში გაზრდილია ადმინისტრაციული ხარჯები და შესაბამისად, მომავალ წელს ქალაქი იგივე პრობლემებით შეხვდება.

"ბიუჯეტის თითქმით ნახევარი ხმარდება ხელფასებს და მათ აქტივისტებს. ეს ბიუჯეტი არ იქნება მოსახლეობაზე ორიენტირებული, შესაბამისად, ვერ დავუჭერდით მხარს. ეს ბიუჯეტი ცხადყოფს, რომ  მომავალ წელსაც ქალაქი გადათხრილი იქნება, პრობლემები კი უფრო მწვავე", - ამბობს გიგა შუშანია. 

საკრებულოში "ევროპული საქართველოს" დეპუტატის, მერაბ მეშველიანის თქმით კი ბიუჯეტი არის ნაჩქარევად შედგენილი და რეალურ საჭიროებებს არ ასახავს.