ქუთაისიპოსტი

ქუთაისის მერიამ 2019 წლის ბიუჯეტის საჯარო განხილვა დაიწყო.
ადგილობრივმა ხელისუფლებამ ბიუჯეტის პროექტი პირველად მუნიციპალიტეტებისა და ბინათმესაკუთრეთა ამხანაგობების წარმომადგენლებს გააცნო. შეხვედრა "მოსახლეობის ფორუმის" ფარგლებში, აკაკი წერეთლის სახელმწიფო უნივერსიტეტის სააქტო დარბაზში შედგა.

ბიუჯეტის მთავარი პრიორიტეტების მოსმენის შემდეგ, ფორუმის მონაწილეები სამ სექციად დაიყვნენ. ინფრასტრუქტურით, სოციალური და ახალგაზრდული მიმართულებებით დაინტერესებული პირები ცალ–ცალკე დარბაზში გადანაწილდნენ. ფორუმის მონაწილეებმა სფეროების შესაბამისად 5–5 ინიციატივა წარადგინეს. ის, რისი გათვალისწინებაც სურთ მომავალი წლის ბიუჯეტში.

ფორუმის ფარგლებში შემუშავებული ინციატივების მიხედვით, შესაძლებელია იმაზე მსჯელობა, რეალურად რა სჭირდება ხალხს.

მიმართულბების გამიჯვნის მიუხედავად, წარმოდგენილი ინიციატივები ძირითადად, მაინც ინფრასტრუქტურას შეეხებოდა. ფორუმის მონაწილეები ითხოვდნენ მუხნარის ტყის კულტურულ– დასასვენებელ პარკად გადაკეთებას, "ტორპედოს" მოედნის კეთილმოწყობას, მუნიციპალიტეტებში ამფითეატრების მოწყობას, სკოლების უზრუნველყოფას ცენტრალური გათბობით, საგანმანათლებლო დაწესებულებების ბიბლიოთეკებით აღჭურვას. გაითვალისწინეს უსაფრთოხოებაც და მოითხოვეს ვიდოეკამერების დამონტაჟება კულტურულ და გასართობ ადგილებში.

ინიციატივების მიხედვით გაირკვა, რომ ადგილობრივებს საგზაო უსაფრთხოება განსაკუთრებით აწუხებთ. კონკრეტულ ქუჩებზე ითხოვენ ხელით სამართავი შუქნიშნების დამონტაჟებას, გზებზე საჩქარის შემაკავებელი ბარიერების მოწყობას, გარეგანათების მონტაჟს, აივნებისა და კორპუსების ფასადების რეაბილიტაციას მათი უსაფრთხოების მიზნით.

ფორუმზე გაიჟღერა ბიზნესიდეამაც. მამია გიორგაძე მერიას ავანგარდის დასახლებაში ძროხების ფერმის დაფინანსებას სთხოვს. მისი თქმით, წარმოებული პროდუქტი სოციალურად გაჭირვებულებს დაურიგდებათ.

ფორუმის საშუალებით ადგილობრივ ხელისუფლებას ხმა მიაწვდინა "ამაგდარ ქალთა ლიგამ", რომელიც რამდენიმე თვეა შენობის გარეშეა დარჩენილი.

საბოლოოდ, ათეულობით ინიციატივიდან მხოლოდ სამი შეირჩა, რომელიც განსახილველად მერიის მრჩეველთა საბჭოს გადაეგზავნება. საბოლოოდ კი, ამ სამიდან 2019 წლის ბიუჯეტში მხოლოდ ერთი დაფინანსდება.

ღია კენჭისყრის შედეგად გადაწყდა, რომ საბჭო არჩევანს საბავშვო ბაღებში ატრაქციონების მონტაჟს, ფასადების, ტროტუარებისა და გარე განათების საკითხების მოწესრიგებასა და დამხმარე მეურნეობის დაფინანსებას შორის გააკეთებს.

ქალაქის ხელისუფლება 2019 წლის ბიუჯეტის 2 მილიონამდე ლარით გაზრდას გეგმავს, რაც საფინანსო სამსახურის უფროსის თქმით, რეგიონალური განვითარების ფონდის ხარჯზე მოხდება.

"ბიუჯეტის დამტკიცებული ვარიანტი იქნება 53 მილიონი, თუმცა, წელს რგფ-დან ველოდებით 11 მილიონს ლარს, რაც შარშან იყო 8 მილიონი. გარდა ამისა, 1 765 000 ლარით გაიზრდება გათანაბრებითი ტრანსფერი," - ამბობს მერიის საფინანსო სამსახურის უფროსი, დავით ნიშნიანიძე.


ქუთაისის მერიის ინფორმაციით, მომავალი წლის ბიუჯეტის საჯარო განხილვები მომავალშიც გაგრძელდება.

ფორუმს არ დაესწრო ქალაქის მერი გიორგი ჭიღვარია.