ქუთაისიპოსტი

სოფელ ქუტირში მდებარე ფსიქიკური ჯანმრთელობის ეროვნული ცენტრის საცხოვრებელი ოთახების უმეტესობა ჰიგიენის მინიმალურ ნორმებსაც კი ვერ აკმაყოფილებს.

ასეთ ინფორმაციას ავრცელებს საქართველოს სახალხო დამცველი ნინო ლომჯარია დაწესებულების მონახულების შემდეგ.

ომბუდსმენის განცხადებაში, რომელსაც ფოტომასალაც თან ერთვის, აღნიშნულია, რომ 600 პაციენტზე გათვლილი ფსიქიატრიული სავალალო მდგომარეობაშია.

„ამორტიზებული შენობა, ჩამოყრილი ბათქაში, ჩამსხვრეული მინები, მორყეული კარ-ფანჯარა, მოუწესრიგებელი სველი წერტილები და სხვა ინფრასტრუქტურული პრობლემები მთლიანი დაწესებულების, განსაკუთრებით კი თავშესაფრის მომსახურებით მოსარგებლე ბენეფიციარებს ადამიანის ღირსების შემლახავ პირობებში ამყოფებს,” - აღნიშნულია სახალხო დამცველის აპარატის მიერ გავრცელებულ ინფორმაციაში.













დაწესებულებაში არსებული მდგომარეობით ქუთასიპოსტიც დაინტერესდა, თუმცა ჟურნალისტებს შენობაში შესვლის საშუალება არ მისცეს.



თუმცა, ფსიქიკური ჯანმრთელობის ეროვნული ცენტრის გენერალური დირექტორმა, გოჩა ბაკურაძემ შენობის გარეთ ჩვენთან კომენტარი გააკეთა.



სახალხო დამცველის მიერ გავრცელებულ ფოტოებზე აღბეჭდილი მძიმე დგომარეობის გარდა, ომბუდსმენი სხვა პრობლემებზეც საუბრობს. მისი განცხადებით, დაწესებულებაში წინა წლებში არსებული მდგომარეობის მსგავსად, კვლავ პრობლემას წარმოადგენს სომატური დაავადებების დროული და ადეკვატური მკურნალობის ხელმიუწვდომლობა, ხანგრძლივი ჰოსპიტალიზაცია და არანებაყოფლობითი სამედიცინო ინტერვენცია.

“სამწუხაროდ, პაციენტთა გარკვეული ნაწილი არ საჭიროებს აქტიურ მკურნალობას, მაგრამ წლების განმავლობაში იმყოფება სტაციონარში, მხოლოდ იმიტომ, რომ „წასასვლელი არ აქვს“. ამის ძირითად მიზეზებს წარმოადგენს გაწერილი პაციენტის მხარდამჭერი სისტემის არარსებობა, მატერიალური დაუცველობა, ხანგრძლივი მოვლის დაწესებულების არარსებობა, ამბულატორიული ფსიქიატრიული სერვისების გეოგრაფიული ხელმიუწვდომლობა და თემზე დაფუძნებული ფსიქიატრიული სერვისების სიმწირე; ასევე დამოუკიდებელი ცხოვრებისათვის საჭირო პაციენტთა უნარ-ჩვევების დეფიციტი“,- აღნიშნულია სახალხო დამცველის აპარატის მიერ გავრცელებულ ინფორმაციაში.

"სომატური დაავადებების დროული და ადეკვატური მკურნალობის ხელმიუწვდომლობისა და პაციენტთა მხარდამჭერი სისტემის არარსებობის შესახებ არის სისტემური პრობლემა და შესაბამისად, ამ რეკომენდაციების ადრესატი არის ჯანდაცვის სამინისტრო", - ამბობს ფსიქიკური ჯანმრთელობის ეროვნული ცენტრის გენერალური დირექტორი, გოჩა ბაკურაძე. 

"სახალხო დამცველი კიდევ ერთხელ მოუწოდებს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს დაუყოვნებლივ შეიმუშაოს და განახორციელოს ფსიქიატრიული დაწესებულებების დეინსტიტუციონალიზაციის სტრატეგია.  ამასთან, უმოკლეს ვადაში უზრუნველყოს ქუტირის ფსიქიკური ჯანმრთელობის ეროვნულ ცენტრში მყოფი პაციენტების მოთავსება ადამიანის ღირსებასთან თავსებად პირობებში“, – აღნიშნულია ომბუდსმენის მიერ გავრცელებულ ინფორმაციაში.

ხონის ფსიქიკური ჯანმრთელობის ეროვნული ცენტრში განმარტავენ, რომ ხონის ფსიქიატრიულს ახალი კორპუსი დაემატება. ახალი ფსიქიატრიულის სტაციონალური კორპუსი დაახლოებით ორ კვირაში გაიხსნება და ის  ევროპული სტანდარტების შესაბამისი იქნება. კორპუსის მშენებლობისთვის ორი მილიონი ლარი იხარჯება.