ქუთაისიპოსტი

რამდენი ბავშვი რჩება ყოველწლიურად სკოლის გარეთ იმის გამო, რომ სასკოლო ასაკი – 6 წელი – სასწავლო წლის დაწყებამდე რამდენიმე დღის, ან თვის შემდეგ უსრულდება? – აღნიშნული ინფორმაცია EDU.ARIS.GE– მ საქართველოს სტატისტიკის ეროვნული სამსახურის მონაცემებზე დაყრდნობით გამოითვალა და აღმოაჩინა, რომ მხოლოდ წელს, სკოლის გარეთ დაახლოებით 13 862 ბავშვი დარჩა.

შეგახსენებთ, რომ 2018-2019 სასწავლო წლისთვის სკოლაში შესასვლელად რეგისტრაცია 48 ათასზე მეტმა პირველკლასელმა გაიარა. სწავლა კი 18 სექტემბერს იწყება. შესაბამისად, დაწყებით საფეხურზე სწავლის დაწყება იმ ბავშვებსაც შეეძლებათ, რომლებსაც 6 წელი 17 სექტემბერს უსრულდებათ.

ზოგადი განათლების შესახებ კანონის მიხედვით, სასწავლო წლის დასაწყისისთვის ბავშვის ასაკი 6 წელი უნდა იყოს და მნიშვნელობა არ აქვს ის სასწავლო წლის დაწყებიდან მეორე დღეს ხდება 6 წლის თუ ერთი თვის შემდეგ.

მიუხედავად იმისა, რომ აღნიშნული კანონის მიღებას თავის დროზე მშობლებსა და დარგის სპეციალისტებში არაერთგვაროვანი გამოხმაურება მოჰყვა და კანონს ბევრი მოწინააღმდეგე გამოუჩნდა, სამინისტროს გადაწყვეტილება არ შეუცვლია და ცვლილება 2015-2016 სასწავლო წლიდან ამოქმედდა.

განხორციელებულ ცვლილებამდე კი, პირველ კლასში შესვლა იმ მოსწავლეებსაც, შეეძლოთ, რომლებსაც 6 წელი წლის ბოლოს უსრულდებოდათ. მეტი თვალსაჩინოებისთვის, მაგალითად ცვლილების დამტკიცებამდე ანუ 2014-2015 სასწავლო წელს ზოგადი განათლების დაწყებით საფეხურზე სწავლის დაწყების უფლება იმ პირებსაც ჰქონდათ, რომელთაც 2015 წლის 1 იანვრამდე 6 წელი შეუსრულდებოდათ, ანუ სწავლას 5 წლის ასაკში იწყებდნენ და შემდგომ ხდებოდნენ 6 წლის.

EDU.ARIS.GE დაინტერესდა, 2015-2016 სასწავლო წლიდან დღემდე რამდენმა ბავშვმა ვეღარ შეძლო ზოგადი განათლების კანონში მიღებული ცვლილების შემდგომ პირველ კლასში შესვლა და აღმოვაჩინეთ, რომ ბოლო 4 სასწავლო წლის განმავლობაში ცვლილების გამო, დროებით, სკოლის გარეთ დაახლოებით 61 146 ბავშვი დარჩა.

სასწავლო წლების მიხედვით იმ ბავშვების რაოდენობა, რომლებიც ასაკის გამო პირველ კლასში ვერ შევიდნენ, შემდეგნაირად გამოიყურება:

2015-2016 სასწავლო წელს – დაახლოებით 16 429 ბავშვი;

2016-2017 სასწავლო წელს – დაახლოებით 15 791 ბავშვი;

2017-2018 სასწავლო წელს – დაახლოებით 15 064 ბავშვი;

2018-2019 სასწავლო წელს – დაახლოებით 13 862 ბავშვი.

აღსანიშნავია, რომ ცვლილების მიზეზად განათლებისა და მეცნიერების სამინისტრომ საერთაშორისო კვლევები დაასახელა, რომლის მიხედვით, გონებრივი და ფიზიკური მზადყოფნისთვის, აუცილებელია, მოსწავლეს 6 წელი შეუსრულდეს, მანამდე კი ის მზად არ არის სასკოლო ცხოვრებაში ჩასართავად.

წყარო: EDU.ARIS.GE