ქუთაისიპოსტი

ქუთაისის მერიამ, არასანქცირებული ორდღიანი აქციისა და თვითნებურად მგზავრობის ფასის გაზრდის გამო, ყველა სამარშუტო ხაზი დააჯარიმა.
თვითმმართველობის წარმომადგენლების გადაწყვეტილებით, თითოეული ხაზი 100-100 ლარით დაჯარიმდა. გადამზიდავი კომპანიების წარმომადგენლები, რომლის მფლობელობაშია მიკროსაავტობუსო ხაზები, მათზე ფინანსურ სანქციის დაკისრების მიზეზად მძღოლებს ასახელებენ.

"მანქანები არ გაგვიჩერებია, მაგრამ ავტობუსის მძღოლები ხელკეტებით დახვდნენ და იძულებული იყვნენ გაჩერებულიყვნენ. უნდა დამერეკა პატრულისთვის, დამეყენებია იქ და ვერავინ გაბედავდა ვერაფერს, მაგრამც მარტო ვერ შევძელი და ამიტომ ავიღე ჩემ თავზე ამ ჯარიმის გადახდა. ისედაც იმხელა გადასახადი მაქვს, კიდე ეს ჯარიმა ზედმეტი იყო. ვინც იყო ამ გაფიცვის მოთავე, ის დაეჯარიმებიათ, ამდენი ხალხი გადაგვყარა ვალებში," - ამბობს შპს "მორბენალის" დირექტორი, მედეა ცერცვაძე. კომპანია "მორბენალი" სამარშრუტო ხაზი #23ა-ს მფლობელია, რომელიც 100 ლარით დაჯარიმდა.
300 ლარის გადახდა დაეკისრა შპს "აბო ჯორჯიას", რომელსაც 3 ხაზი ეკუთვნის.

კომპანიაში განმარტავენ, რომ ორგანიზაციამ მოსალოდნელი ფინანსური სანქციის შესახებ იცოდა და შეეცადნენ ამის შესახებ მძღოლების ინფორმირებას, თუმცა უშედეგოდ.

"დაჯარიმება და გაფიცვა არავის უნდა," - ამბობს შპს "აბო ჯორჯიას" დირექტორის მოვალეობის შემსრულებელი, ნანი ჩომახიძე.
ამ გადამზიდავი კომპანიის დაქვემდებარებაში სამი მიკროსაავტობუსო ხაზია.

შპს "სამგზავროში" კი, რომელიც ქალაქში ყველაზე მეტ მიკროსამარშრუტო ხაზს ფლობს, ამბობენ, რომ საჯარიმო სანქციების შესახებ იმსჯელებენ. მერიამ კომპანიის 7 ხაზი დააჯარიმა.

"შევეცადეთ ეს ხაზები არ გაფიცულიყვნენ, მაგრამ მაინც ვერ შევაჩერეთ," - ამბობს კომპანიის ხელმძღვანელი, ალეკო დვალიშვილი.

ქუთაისის საქალაქო ტრანსპორტის მძღოლებმა მგზავრობის ღირებულება 0.10 ლარით მას შემდეგ გაზარდეს, რაც ორდღიანი გაფიცვის მიუხედავად მერიის წარმომადგენლებთან შეთანხმებას ვერ მიაღწიეს. სატრანსპორტო მუშაობა მიმდინარე წლის 7 მარტს საღამოს საათებში, თუმცა გაზდილი ტარიფით აღდგა.

მგზავრობის საფასურის გაზრდასთან დაკავშირებით ქუთაისის მერიის პრესსამსახურმა განცხადება გაავრცელა, სადაც აღნიშნულია, რომ ფასის გაზრდა თვითნებურად მოხდა. მერიაში იმ მძღოლის გამოსავლენად, რომელიც მგზავრობის საფასურს გაზრდილი ტარიფით მოითხოვდა, ცხელი ხაზიც კი აამოქმედეს.

ამ დროისთვის ქუთაისის მერიის მიერ 42 მიკროსაავტობუსო და 10 საავტობუსო ხაზზეა ნებართვა გაცემული. ქალაქში მგზავრთა გადაყვანას ყოველდღიურად 160 საქალაქო მიკროავტობუსი და 70 ავტობუსი ემსახურება.


ამავე თემაზე:

ქუთაისში საქალაქო ტრანსპორტის მძღოლები გაიფიცნენ

"ვითხოვთ მხოლოდ ათ თეთრს" - ქუთაისში გაფიცული მძღოლების მოთხოვნები

"არ გვეუბნებიან იმუშავებენ თუ არა"- მგზავრები გაფიცულ მძღოლებზე (ფოტო)

"გაფიცვა არაფერს მოგცემთ" - ვიცე-მერი გაფიცულ მძღოლებს

"დღეს ტრანსპორტი არ იმოძრავებს" - ქუთაისში მძღოლების გაფიცვა გრძელდება

ქუთაისში მეორე დღეა საქალაქო ტრანსპორტის მძღოლები გაფიცულები არიან

შეწყვეტილი გაფიცვა და 10 თეთრით გაძვირებული ტრანსპორტი ქუთაისში

ქუთაისის მერია მგზავრობის გაზრდილ ტარიფზე: შესაბამისს ხაზებზე გამოიწერა ჯარიმები