ქუთაისიპოსტი

სკოლამდელი აღზრდის დაწესებულების აღმზრდელებს პედაგოგის, ხოლო მათ დამხმარეებს აღმზრდელის სტატუსი 2017 წლის 1 სექტემბრიდან მიენიჭებათ.

განათლების და მეცნიერების სამინისტროს ინფორმაციით, ახალი კანონპროექტი ბაგა ბაღებში სწავლის, მომსახურებისა და ხელმისაწვდომობის გაუმჯობესებისთვის შეიქმნა.

"უკვე გვაქვს სკოლამდელი მზაობის პროგრამა, შესაბამისი სტანდარტიც დამტკიცებულია. როგორც კი კანონი ძალაში შევა, ჩვენც დავიწყებთ ყველა სხვა თანამდევი საკითხების დამტკიცებას,"- აცხადებენ განათლების და მეცნიერების სამინისტროში.

კანონპროექტის თანახმად, 10-მდე სამთავრობო სტრუქტურა თავის თავზე აიღებს პასუხისმგებლობას ბაგა-ბაღების გამართულად მუშაობაზე. რეგულირებადი იქნება ჯგუფებში ბავშვების რაოდენობაც. ამასთან, ყველა ამღზრდელ-პედაგოგი ვალდებული იქნება, ძალადობის საკითხებთან დაკავშირებით გადამზადება გაიაროს. კანონპროექტის მიხედვით, ყველა ბაგა-ბაღში უნდა შეიქმნას მშობელთა საკონსულტაციო საბჭოები.

2-3 წლის ბავშვთა ჯგუფში არაუმეტს 25 ბავშვი უნდა იყოს, ხოლო რაც შეეხება აღმზრდელ-აღსაზრდელის თანაფარდობას, არ უნდა აღემატებოდეს 1-13-თან.

3-4 წლიან ჯგუფებში უნდა იყოს არაუმეტს 30 ბავშვი – მათი თანაფარდობა პედაგოგებთან  უნდა იყოს 1-15-ზე. ყველა ზედა ასაკობრივ ჯგუფშიც თანაფარდობის ანალოგიური სისტემა იმოქმედებს.

კანონპროექტი დაადგენს ბაგა-ბაღების ავტორიზაციის საკითხსაც. თავად კანონი ძალაში 2017 წლის 1 სექტემბრიდან შევა, ხოლო კანონის ის მუხლი, რომელიც ჯგუფის მოცულობასა და პედაგოგების თანაფარდობას განსაზღვრავს, 2020 წლის პირველი სექტემბრიდან უნდა ამოქმედდეს.